هيءَ هڪ سياسي اصطلاح آهي، جنهن جو اصل مقصد هر ملڪ کي پنهنجي سياسي، معاشي ۽ سماجي معاملن بابت غور ويچار ڪري (ٻين تي ڀاڙڻ بجاءِ) پاڻ حل ڪرڻ گهرجي ۽ سندس معاملن ۾ ٻئي ڪنهن اداري يا ملڪ کي مداخلت جي اجازت نه هجڻ گهرجي. انهيءَ بُنيادي تصور کي ذهن ۾ رکندي جرمنيءَ جي سياسي عالم ”لُتوماڪر“، ”Small is the beautiful“ جو نظريو ڏنو هو. ”مقاميت“ جڳ مشهور نظريي ”ڀونءِ- واد“ جي بلڪل اُبتڙ ڏنل نظريو آهي، ڇاڪاڻ ته ”ڀونءِ واد“ تحت دُنيا جو هر مسئلو بين الاقوامي برادريءَ جي موجودگيءَ ۽ ڪنهن به سياسي، معاشي ۽ سماجي جوڙجڪ جي سلسلي ۾ عالمي سطح جي صلاح مصلحت ڪرڻ تي زور ڏئي ٿو. 1960ع جي ڏهاڪي ۾ آمريڪا ۽ ويٽنام جي وچ ۾ جاري ڇڪتاڻ کي ڏسندي، ڪافي ملڪن ”گلوبلائيزيشن“ کي ڇڏي ”لوڪلائيزيشن“ واري پاليسيءَ کي ترجيح ڏني ۽ ڇاڪاڻ ته بدليل حالتن ۾، اڪثر ملڪن جي حڪومتن پنهنجي ملڪي معاملن ۾ ٻئي ڪنهن ملڪ جي مداخلت نه پئي چاهي. پر جنگي ماحول ۾ واڌ ۽ عالمي سطح تي سيڪيورٽي جي مسئلن ۾ شدت کان سواءِ غريب ملڪن جي معيشيت کي سهارو ڏيڻ لاءِ ٿيل معاشي اتحادن جي بنياد تي عالمي سياسي منظرنامي ۾ ”گلوبلائيزيشن“ واري ترجيح ڏينهون ڏينهن وڌيڪ چٽي ٿي رهي آهي. ان هوندي به جيئن ته مُلڪي اندروني ۽ بيروني معاملن ۾ هر ملڪ ٻنهي يعني ”لوڪلائيزيشن“ ۽ ”گلوبلائيزيشن“ جي اصولن تحت ملڪي پاليسيون ٺاهڻ کي ترجيح ڏئي ٿو، تنهن ڪري جديد دور جي سياسي ماهرن جو خيال آهي ته ”لوڪلائيزيشن“ جو تصور ”گلوبلائيزيشن“ واري تصور جي خلاف نه، بلڪ ان جي وڌندڙ دائري کي ذهن ۾ رکندي، هيٺين سطح جي ڪيترن معاملن کي مقامي طور طريقن سان حل ڪرڻ جو هڪ طريقو آهي، ته جيئن بين الاقوامي برادريءَ ۾ ”گڏيل ترجيحن ڀريل ايجنڊا“ تحت داخل ٿي سگهجي