ٻي مهاڀاري لڙائي 1939ع کان 1945ع تائين وڙهي وئي، جنهن ۾ هڪ طرف ’اتحادي ڌر‘ طور آمريڪا، فرانس برطانيا، روس، پولنڊ، چين، ڪئناڊا ،آسٽريليا، نيوزيلئنڊ، ڏکڻ آفريقا، يوگوسلاويه، ناروي، نيدرلئنڊس، بيلجيم ۽ يونان وغيره شامل هئا ۽ ٻئي پاسي ’محوري طاقتن‘ ۾ جرمني، جپان اٽلي، هنگري، رومانيا، بلغاريا، فنلئنڊ، عراق، ٿائيلئنڊ، مانچوڪو، ڪروشيا ۽ سلواڪيا وغيره هئا. ’مڪمل لڙائيءَ‘ (Total War) جي شڪل ۾ شروع ٿيل هن تڪرار ۾، ٻنهي ڌرين پنهنجون سڀ معاشي، سائنسي، صنعتي ۽ انساني صلاحيتون داءَ تي لڳائي ڇڏيون ۽ ان ۾ 100 ملين انسانن حصو ورتو. جنگ جي شروعات 01- سيپٽمبر 1939ع تي جرمنيءَ جي پاران اتحادي ڌُرين کان بنا پُڇئي پولينڊ تي قبضو ڪرڻ سان ٿي، ان کان سواءِ جرمنيءَ مٿان مڙهيل ورسيلز جو سخت ٺاهه، جرمنيءَ پاران پهرين مهاڀاري لڙائيءَ ۾ مليل هار جي بدلي وٺڻ جو خواب، يورپ ۾ آمريتي حڪومتن ۾ واڌ ۽ جاپاني سامراجيت جو ڦهلاءُ پڻ ٻي عالمي جنگ جا مک سبب هيا. لڙائيءَ دوران معاهدن ۽ طاقت جي زور تي جرمني هڪ طرف اڌ يورپ تي قابض ٿي ويو، ته ٻئي پاسي سندس اتحادي جاپان پئسيفڪ سمنڊ جي علائقي ۾ تباهيون مچائي ڇڏيون. ايئن ٿي لڳو ته ’محوري فوجن‘ کي دنيا جي ڪا به طاقت روڪي نه ٿي سگهي. پر جون 1941ع ۾ روس تي جرمن حملي کان پوءِ روسي فوجن پاران سخت مهاڏي سبب لڙائيءَ جو رخ بدلجڻ لڳو. 1942ع ۾ اسٽالن گراڊ ۾ جرمن فوج کي مليل شڪست کان پوءِ آفريقا، پئسيفڪ، اتر يورپ ۽ فرانس ۾ سوڀن سميت اٽليءَ تي اتحادين جو قبضو ٿي ويو ۽ روسي فوجون جرمنيءَ ۾ داخل ٿي ويون. 12 سيبٽمبر 1945ع تي ايشيا ۾ جاپان تي آمريڪا جي طرفان ائٽم بم ڪيرائڻ کان پوءِ جاپاني هار جي نتيجي ۾ آخرڪار جنگ جو خاتمو ممڪن ٿيو. هن جنگ ۾ 50 ملين ماڻهو ماريا ويا. 40 ملين ماڻهو بي گهر ٿيا ۽ 2000 ارب ڊالرن جو نقصان ٿيو. جنگ جي نتيجي ۾ نه رڳو دنيا جو جاگرافيائي سياسي ۽ سماجي نڪ نقشو نه مٽجي ويو، پر عالمي امن لاءِ اڳڀرائيءَ جي سلسلي ۾ سنجيده ڪوششون ٿيون، جنهن جي نتيجي ۾ ’گڏيل قومن‘ جي اداري جو وجود پيو. ان کان سواءِ بين الاقوامي سياسي سرشتي ۾ اڳوڻين عالمي طاقتن جي جڳهه تي سوويت يونين ۽ آمريڪا دنيا جا ’سپر پاور‘ ٿي اڀريا، ايندڙ 46 سالن تائين ’سرد جنگ‘ جو مرحلو شروع ٿيو، آفريقا ۽ ايشيا مان بيٺڪيت جو خاتمو ۽ غلام قومن جي آزادي ممڪن ٿي ۽ يورپ ۾ سهڪار جو ماحول جڙيو. جنهن ڪري يورپ نه رڳو جنگ ۾ ٿيل نقصانن جو ازالو ڪيو، پر اڳتي هلي يورپي کنڊ ۾ سياسي ڳانڍاپو کي به ممڪن ڪيو