آسٽريليائي سفاتڪار ۽ دانشور ’جان ڊبليو برٽن‘ جو نظريو،جنهن ۾ هن قومن ۽ رياستن جي پاڻ ۾ لهه وچڙ جي بنياد تي بيٺل عالمي سرشتي کي رد ڪندي ٻڌايو آهي، ته خودمختياري (Sovereignty) جو روايتي تصور انساني سماج جي اصل روين، خواهشن ۽ مستقبل بابت تصورن جي ترجماني نٿو ڪري سگهي. برٽن جو خيال هو ته علائقي (Territory) جي بُنيادن تي پاليسيون جوڙڻ ۽ عام رواجي نقشي (Map) جي بُنياد تي عالمي برادريءَ جي مفادن جو تعين ڪرڻ عالمي وهنوار کي هلائڻ جي هڪ ناڪام ڪوشش آهي، جنهن جو ڪڏهن به مٺو ڦل ناهي ملڻو. هن جي سوچ مطابق طاقت (Power) جي چوڌاري گهمندڙ سياست جو نتيجو خود فريبيءَ تي ٻڌل محرڪن، جهڙوڪ: جنگي برابري (Deterrence) ۽ ”طاقت جو توازن“ جهڙن تباهه ڪن پهلوئن کي جنم ڏئي ٿو. ان جي اُبتڙ عالمي برادريءَ کي درپيش مسئلن جي حل لاءِ هُو اڳرائي پسنديءَ واري لاڙي بدران سهڪار ۽ پر امن لاڙن جي حمايت ڪري ٿو، جنهنڪري سندس مُخالف کيس غيرعمليت پسند ۽ ”خيالي دانشور“ به سڏيندا آهن. پنهنجن خيالن جي ڪري برٽن انهن سڀني فائدن کان محروم رهيو، جيڪي طاقت جي حامي دانشورن کي ملندا آهن. ”عالمي سماج“ جي بُنيادي تصور ۾ فقط سياسي بُنيادن تي قومن جي برادري جوڙڻ بدران قومن جي سموري زندگيءَ جا رنگ ۽ پهلو بحث هيٺ آڻڻ ۽ ثقافتي ۽ ٻين محاذن تي مُختلف قومن کي گڏ ڪرڻ وارا پهلو شامل ڪرڻ ۽ اها گڏپ ”ادارتي“ ۽ انفرادي دائرن تائين وسيع ڪرڻ تي زور ڏنو ويو آهي. ’برٽن‘ جي خيال موجب اعليٰ انساني قدر ئي دنيا جي دُرست رُخ ۾ راهنمائي ڪري سگهن ٿا. دنيا جي ڪار وهنوار ۾ امن، سفارتڪاري ۽ تعلقات ٺاهڻ جا روايتي طريقا پنهنجو اثر وڃائي چُڪا آهن، تنهنڪري عالمي پئماني تي ’سمجهه ڀريي تعاون‘ ذريعي ئي دُنيا کي بهتر روپ ڏياري سگهجي ٿو. سندس مُخالف، مٿس ’خيال پرست‘ هُجڻ جو الزام هڻن ٿا