Water-borne infection

واٽر ـ بارن ـ انفيڪشن

پاڻيتي، پاڻيءَ رستي پکڙجندڙ بيماري/ روڳ. ڪا به اھڙي بيماري جيڪا پاڻيءَ ۾ موجود ڪنھن روڳيندڙ يا پيراسائٽي جيوڙي سبب پکڙجي. بيمارين ۾ تڏھن وچڙجي ٿو جڏھن غليظ / ڪنو پاڻي پيئجي ٿو، کاڌي کي غليظ ڪري ٿو يا اھڙي پاڻيءَ ۾ ترجي ٿو يا جهاڳجي ٿو. سڄي دنيا ۾ گندو پاڻي پيئڻ مختلف بيمارين جي ڦھلجڻ جو ھڪ اھم ذريعو ٿئي ٿو جنھن ۾ ھيپيٽائيٽس اَي (hepatitis A)، ڪيترا وائرس ۽ بئڪٽيريا ڊائريا، ٽائفائيڊ بخار، ڪالرا، امِيبِاسس (amoebiasis) ۽ ڪن قسمن جي ڪينئن جون بيماريون ٿي پون ٿيون. ڪني پاڻيءَ ۾ وھنجڻ ۽ ترڻ کان پرھيز ڪرڻ گهرجي، جيڪڏھن اھڙو پاڻي پي وڃجي ته بيمار ٿيڻ جو خطرو ٿي پوي ٿو. ان کانسواءِ ھڪ قسم جو ليپٽواِسپائروسس (leptospirosis) بيماري اھڙي پاڻيءَ سان لاڳاپي ۾ اچڻ سان ٿي پوي ٿي جيڪو ڪوئيءَ جي پيشاب سبب غليظ ٿي ويو ھجي. استوائي ملڪن ۾ شِسٽوسوميائسِس (bilharzia/schistosomiasis) ٿيڻ جو به خطرو رھي ٿو جيڪا سنگين بيماري ھڪ پيراسائٽي فلوڪ جي چمڙيءَ رستي جسم ۾ داخل ٿيڻ سان ٿي پوي ٿي.