Uterus, cancer of

يو.ٽيرس ـ ڪينسر ـ آف

ڳڀيرڻ جي ماس/ ٽشوئن ۾ ٿيندڙ ھڪ ھاڃيڪار واڌ. ڳڀيرڻ جي ڪينسر مکيو طور تي ڳھڻ (ڏسو،cervix, cancer of) ۽ اينڊوميٽريم (ڳڀيرڻ جي استر) کي متاثر ڪري ٿي. ورلي حالتن ۾ ڳڀيرڻ جي مشڪ ھڪ اھڙي قسم جي ڪينسر ۾ مبتلا ٿئي ٿي جنھن کي ليئيوميوسارڪوما (leiomyosarcoma) سڏجي ٿو. عام طور تي ڳڀيرڻ جي ڪينسر جو مطلب اينڊوميٽريم جي ڪينسر جو ورتو وڃي ٿو. اينڊوميٽريم جي ڪينسر پيدا ٿيڻ ۾ ڪيترا پھلو شامل ٿين ٿا جن ۾ ڪا به اھڙي ڳالهه شامل ٿئي ٿي جيڪا جسم ۾ ايسٽروجن جي سطح وڌائي سگهي ٿي جھڙوڪ: ٿلهائپ (obesity)، آنجڻ جو عمل ٿي نه سگهڻ يا ايسٽروجن ھارمون ڊگهي عرصي کان استعمال ڪرڻ ۽ اھي پروجيسٽوجين دوائن سان توازن ۾ نه وٺڻ. اھا ڪينسر انھن عورتن ۾ گهڻي عام ٿئي ٿي جن کي ڪجهه ٻار ٿين ٿي يا بلڪل نٿا ٿين. ٽماڪسفِن (tamoxifen) دوا به اينڊوميٽريل ڪينسر جي خطري وڌائڻ سان لاڳاپيل ٿئي ٿي.سنڍجڻ (menopause) کان اڳـ۾ ڳڀيرڻ جي ڪينسر جي پھرين نشاني مينوريجيا (menorrhagia، حد کان گهڻي ماھواري اچڻ)، ماھوارين جي وچ ۾ يا ھمبستريءَ کانپوءِ رت اچڻ ٿي سگهي ٿي. سنڍجڻ کانپوءِ عام طور تي اھا گرڀ ناليءَ جي رتھڻي پاڻيٺ ٿئي ٿي. تشخيص ھسٽيرواسڪوپي (hysterectomy)، الٽراسائونڊ اسڪيننگ (ultrasound scanning) يا بايوپسيءَ (biopsy) رستي ڪجي ٿي. عام طور تي اينڊوميٽريائي ڪينسر جي بلڪل اوئلي علاج ۾ ھسٽيريڪٽوميءَ (hysterectomy)، فيلوپين نليون ۽ آنيدانيون ڪڍي ڇڏجن ٿيون. جيڪڏھن ڪينسر وگهري ويل ھجي ته ريڊيوٿراپي (radiotherapy) ۽ اينٽي ڪينسري دوائون به استعمال ڪري سگهجن ٿيون.