Ultrasound scanning

ال.ٽرا.سائونڊ ـ اسڪيننگ

بيماري تشخيص ڪرڻ جو ھڪ اھڙو طريقو جنھن ۾ جسم ۾ وڏي تعدد واريون آوازي لهرون گذاري موٽ کائيندڙ پڙاڏن مان اندرين عضون يا ڳڀيرڻ ۾ موجود ابھم جي تصويرن رستي ڇنڊڇاڻ ڪجي ٿي. ھي طريقو بنا تڪليف ۽ سلامتيءَ وارو ٿئي ٿو. الٽراسائونڊ لهرون ھڪ ٽرانسڊيوسر (transducer) پيدا ڪري ٿو جيڪو جسم جي چمڙيءَ جي ان حصي مٿان رکجي ٿو جيڪو تپاسڻو ھجي ٿو. ٽرانسڊيوسر ۾ ھڪ اھڙو قلم (crystal) ٿئي ٿو جيڪو برقي لهر کي آوازي لهرن ۾ تبديل ڪري ڇڏي ٿو، اھي بنا دير ملائم ٽشوئن ۽ پاڻيٺ مان پار پئجي وڃن ٿيون جنھن سبب ھن طريقي کي پاڻيٺ ڀريل يا ملائم عضون جي چڪاس لاءِ ڪارائتو ڪري ڇڏين ٿا. الٽراسائونڊ جو عام استعمال حمل دوران ڪنھن وقت به ڳڀيرڻ ۽ ابھم جي چڪاس ڪجي ٿي جڏھن ته گهڻو عام 18 کان 20 ھفتن دوارن چڪاس ڪرڻ ٿئي ٿي. جنھن سان ابھم جي عمر، قد ۽ ٿيندڙ واڌ جو اندازو، ھڪ کان وڌيڪ ٻارن ھجڻ جي ڄاڻ ۽ ڪن مسئلن جھڙوڪ: نيورول ٽيوب ڊفيڪٽ (neural tube defects) جي تشخيص ڪري سگهجي ٿي. جيڪڏھن ڪن مسئلن جھڙوڪ: اِڪٽوپڪ پريگننسي (ectopic pregnancy) جو شڪ ھجي ته حمل جي اوائل ۾ انھن جي به ڄاڻ رکي سگهجي ٿي.الٽراسائونڊ اسڪيننگ رستي نون ڄاول ابھمن جي کوپريءَ جي وٿيءَ رستي انھن جي مغز جي به چڪاس ڪري سگهجي ٿي (مثال طور؛ ھيڊروسيفيلس). الٽراسائونڊ رستي ڪيترن قسمن جا نقص جھڙوڪ: سِراسس (cirrhosis)، پتي جون پٿريون (gallstones)، ھيڊرونيفروسس (hydronephrosis) ۽ پئنڪريئاٽيٽس (pancreatitis) به تشخيص ڪري سگهجن ٿا. ڊاپلر الٽراسائونڊ، جي جديد طريقي ۾ ڊاپلر افيڪٽ (Doppler effect) استعمال ڪندي چرپر ڪندڙ جسمن جي جاچ ڪجي ٿي. ان طريقي سان پيٽ واري ابھم جي دل جي ڌڙڪن ۽ رت نلين ۾ رت جي وھڪري جي رفتارجاچي سگهجي ٿي.