ڏکڻ آفريقا ۾ لوڪ ڏاهپ تي مبني مشهور اصطلاح جيڪو انسانذات وچ ۾ هاڪاري لاڳاپن ۽ سهڪار لاءِ استعمال ڪيو ويندو آهي. هي اصطلاح ”بانتو“ ٻولين جي لفظ Ubuntu (گڏيل انسانيت) تي مُبني آهي ۽ اتان جي مشهور چوڻي: Lmuntu ngumuntu nagabantu (مُنهنجو وجود ’اسان‘ سان سلهاڙيل آهي) مان ورتل آهي. ان جو مطلب آهي ته انساني فطرت جو اعليٰ ترين اظهار ٻين انسانن سان سهڪاري روين تحت زندگي گهارڻ ۾ آهي. ان ڪري Ubuntnu جو اصطلاح هڪ ٻئي سان اختلاف رکڻ باوجود سڀني انسانن جي ويجهڙائپ تي زور ڏئي ٿو ۽ اهڙي ويجهڙائپ کي پيار، سهپ، عزت، سهڪار، احتساب ۽ ذميواريءَ جا بنياد مُهيا ڪري ٿو. انهن بُنيادن ۾ فطرت ۽ روحانيت کي هڪٻئي سان سلهاڙيندي، انهن عنصرن کي عام زندگيءَ ۾ هاڪاري روين، باهمي احترام ۽ برابريءَ جي اظهار طور مڃتا ڏياري ٿو. بين الاقوامي تعلقات ۾ ”اخلاق پسند“ ۽ ”آدرش- وادي“ حلقا هن تصور کي انسانذات لاءِ انتهائي ڪارائتو قرار ڏين ٿا