ڏکڻ آفريقا ۾ نسلي متڀيد (Aparthied) تي ٻڌل حُڪومتي نظام جي خاتمي کان پوءِ، مُلڪي قانون ساز ادارن طرفان هڪ نيم-عدالتي ڪميشن جوڙي وئي، جنهن جو ڪم نسلي متڀيد واري نظام دوران، ڏکڻ آفريقي عوام مٿان ٿيل ظُلمن، انساني حقن جي ڀڃڪڙين، جنگي ڏوهن ۽ زيادتين جو جائزو وٺڻ ۽ نئين سرشتي جي سرسيءَ لاءِ سهڪار ۽ سهائتا ڀريو ماحول پيدا ڪرڻ هو. اها ڪميشن نسلي متڀيد جو شڪارٿيل فردن ۽ گروهن جي تسليءَ ۽ دلجوئي ڪرڻ سان گڏ، مُلڪي تعمير لاءِ درگُذر جي جذبي کي اُڀارڻ لاءِ جوڙي وئي. ان ڪري کيس ”ڏوهه جي اقرارين“ کي معافي ڏيڻ، سنگين ڏوهارين کي عوامي ٻُڌڻين آڏو پيش ڪرڻ ۽ مُلڪ ۾ رهندڙ مڙني نسلن کي بهتر آئيندي بابت آگاهي ڏيڻ هو. هيءَ ڪميشن دُنيا ۾ ٺهيل ڪُل 19 ڪميشنن مان هڪ هُئي، جيڪا 1995ع ۾ ڏکڻ آفريقي پارليامينٽ جي ايڪٽ 34: ”قومي ٻڌيءَ جي واڌاري ۽ ٺهي هلڻ واري نيتي“ تحت وجود ۾ آئي. ڪميشن جو سربراهه جڳ مشهور انساني حقن جي راهنما ”آرچ بشپ ڊسمنڊ ٽوُٽوُ“ کي مقرر ڪيو ويو. 28-آڪٽوبر 1998ع تي ان ڪميشن پنهنجي رپورٽ ۾ نسل پرست اڳوڻي ڏکڻ آفريقي حُڪومت ۽ آزادي پسند ”آفريقي قومي ڪانگريس“ کي انساني حقن جي لتاڙ لاءِ ذميوار قرار ڏنو ۽ مستقبل ۾ قوم جي سمورين ڌُرين کي هڪٻئي سان سهڪار ڪرڻ جي هدايت ڪئي. هن ڪميشن جي قيام ڏکڻ آفريقا ۾ درگُذر ڪرڻ جي جذبي کي هٿي ڏني ۽ قومي ترقيءَ کي ممڪن بڻايو. ڪميشن جي قيام بابت بُنيادي خاڪو، ڏکڻ آفريقا جي آزادي پسند اڳواڻ نيلسن منڊيلا ڏنو هو