Thyroid cancer

ٿاءِ.روائڊ ـ ڪينسر

ٿائروائڊ غدود جي ورلي ٿيندڙ ڳوڙھي. گهڻين حالتن ۾ ان جي ڪارڻن جي ڄاڻ ڪونھي جڏھن ته شعاعدار فال آئوٽ (نيوڪليائي ڌماڪن جو ڇاڻ) ۾ وائکي ٿيڻ سان ان جي پيدا ٿيڻ جو خطرو وڌي وڃي ٿو. ان جا ڪيترا قسم ٿين ٿا جن جو مدار متاثر ٿيندڙ سيل تي ٿئي ٿو. جڏھن ته سڀني جي پھرين نشاني ڳچيءَ ۾ ھڪ سخت ڳوڙھيءَ (firm nodule) جو پيدا ٿيڻ ٿئي ٿو جيڪا آھستي آھستي يا تيزيءَ سان واڌ ڪري سگهي ٿي. گهڻين حالتن ۾ ڪينسر بنا سور جي ٿئي ٿي ۽ تڪليفون جھڙوڪ: ڳھڻ ۾ تڪليف ۽ آواز جو گهگهو ٿيڻ يا ختم ٿي وڃڻ تڏھن پيدا ٿئي ٿو جڏھن ڳوڙھي ٻين بناوتن تي دٻاءُ وجهي ٿي. تشخيص لاءِ ٿائروائڊ اسڪيننگ (thyroid scanning) ۽ نيڊل ايسپائريشن (needle aspiration) يا بايوپسي (biopsy) ڪجي ٿي. عام طور تي ٿائروائڊيڪٽومي (thyroidectomy) کانپوءِ ريڊيوايڪٽو آيوڊين (radioactive iodine) يا ريڊيوٿراپيءَ (radiotherapy) جي علاج سان رھيل ڪينسر ختم ڪري ڇڏجي ٿي. شفا جو مدار، تشخيص وقت سيل جي قسم، سائيز ۽ ڳوڙھي جي وگهر تي ٿئي ٿو. مريضن کي باقي عمر لاءِ ٿائراڪسن (thyroxine) جي نعم البدل علاج تي رھڻو پويٿو.