Thrombosis, deep vein

ٿرام.بوسس ـ ڊيپ ـ وين

. ٽنگ جي اونھين نسن ۾ ڪنھن ٿرامبس (thrombus) جو پيدا ٿيڻ. جنھن جو عام طور تي ٻٽو ڪارڻ يعني، جسم جي ھڪ حصي مان رت جي آھستي گردش ٿيڻ (جڏھن گهڻي دير تائين ويٺل رھجي يا جڏھن ٽشو دٻيل رھن ٿا جيئن ڊگهي ھوائي سفر ۾ ٿئي ٿو) ۽ رت ۾ دڳجڻ جو وڌيڪ لاڙو ھجڻ جيڪو سوڪھڙي، آپريشن يا ضرب کانپوءِ، حمل دوران ۽ حمل روڪ گوريون (oral contraceptives) واپرائيندڙ عورتن ۾ ٿئي ٿو.ڊِيپ وين وٿرامبوسس جو ڪارڻ پاليسيٿيميا (polycythaemia) به ٿي سگهي ٿي. ڊِيپ وين ٿرامبوسس انھن ماڻھن ۾ عام ٿئي ٿي جن جي دل درست طريقي سان ڪم نٿي ڪري، فالج (stroke) جو شڪار ٿيل ھجن ۽ ھڪ ڊگهي عرصي کان چرپر نٿا ڪن. ٽنگن جي نسن ۾ رت جا دڳ سور، ڏکڻائپ، سوڄ، چمڙيءَ جو بدرنگ ھجڻ، السر پيدا ڪري سگهن ٿا پر پوءِ به تڪليف پيدا نٿا ڪن. ڊيپ وين ٿرامبوسس پنھنجو پاڻ سنگين نٿي ٿئي پر دِڳ جو حصو ٽٽي رت جي دوري رستي ڦڦڙن تائين رسي سگهي ٿو. جنھن کي پلمونري اِيمبولزم (pulmonary embolism) سڏجي ٿو. تشخيص، ڊاپلر الٽراسائونڊ اسڪيننگ (Doppler ultrasound scanning) رستي ڪجي ٿي. علاج جو مدار دڳن جي ھنڌ ۽ مقدار تي ٿئي ٿو. ننڍن دڳن جي حالت ۾ جڏھن اھي پنين تائين محدود ھجن ۽ مريض به گهمي ڦري سگهندو ھجي تڏھن انھن جو علاج ڪرڻ ضروري نه به ٿي سگهي ٿو. نه ته اينٽي ڪوآگيولنٽ (anticoagulant) يا ٿرامبولائيٽڪ (thrombolytic) دوائون ڏجن ٿيون. جيڪڏھن ڪنھن پلمونري ايمبولزم سبب گهڻو خطرو ھجي ته ٿرامبيڪٽومي (thrombectomy) ڪري سگهجي ٿي.