ٽين دُنيا جا اُهي ملڪ، جيڪي آفريقي کنڊ ، ڪيريبين سمنڊ جي ڪناري ۽ پيسفڪ سمنڊ واري علائقي سان لاڳاپيل آهن، انهن ملڪن 1963ع ۾ ”يورپين اڪنامڪ ڪميونٽي“ سان واپار ڪرڻ ۽ کانئس معاشي مدد وٺڻ لاءِ ”يائونڊي ڪنوينشن“ تحت ساڻس معاهدا ڪيا. ”يائونڊي ڪنوينشن“ کي 1975ع ۾ مٽائي ”لوم ڪنوينشن“ جو نالو ڏنو ويو ، جنهن ۾ دُنيا جا ستر ملڪ شامل ٿيا. ان کان پوءِ يورپين يونين، ACP سان لاڳاپيل مُلڪن جي باقاعده آفيس قائم ڪئي ۽ پارليامينٽ جي اداري جو سرشتو ترتيب ڏنو، جنهن ۾ وزارتي ڪائونسل، سفيرن جو ڪميٽيون ۽ اسيمبلي جوڙي وئي. اهڙي طرح ”لوم ڪنوينشن“ تحت ميمبر ملڪن وچ ۾ سهڪار کي هٿي ڏيڻ جو اصل مقصد، واپاري سرگرمين کي تيز ڪرڻ هيو، ڇاڪاڻ جو ان دوران دُنيا ۾ ڪميونزم جو زور ٽٽي چڪو هيو ۽ يورپ کي نين منڊين جي ضرورت هئي. ٻئي طرف ٽين دنيا جي ملڪن ۾ پڻ ترقيءَ جي لاءِ ٿيندڙ جاکوڙ ۽ ضرورتن کي ڏسندي، يورپي يونين، ACP ملڪن سان ڪيترائي معاهدا ڪيا. اولهه جي مُلڪن جي انهيءَ دلچسپيءَ کي نظر ۾ رکندي. ڏکڻ آفريقا پڻ لوم/ ACP ملڪن ۾ شامل ٿيڻ جي خواهش ڏيکاري، پر تنظيم طرفان اها درخواست منظور نه ڪئي وئي، ڇاڪاڻ جو اولهه جي معيارن مطابق ڏکڻ آفريقا ”ٽين دنيا“ جي ملڪن واري درجي ۾ نٿو، اچي. پرڪن مبصرن جي راءِ آهي ته آفريقا جي اُسريل مُلڪن کي هن اتحاد ۾ شامل نه ڪرڻ واري روش ”لوم“ جي ناڪاميءَ جو سبب بڻجي سگهي ٿي. محققن جو خيال آهي ته وڌيڪ متحرڪ هُئڻ جي ڪري ”لوم“ کان وڌيڪ ASEAN جي تنظيم اڳتي هلي ٽين دنيا جي ملڪن ۽ يورپ جي وچ ۾ وڌيڪ سهڪار ۽ معاهدن جو ذريعو بڻجندي