Syphilis

Syphilis

سائفلس

Syphilis

Syphilis

سِف.لس

بادفرنگ. ٽريپونيما پاليڊيم (Treponema pallidum) بئڪٽيريا نالي، جماع يا ٻين گهرن جنسي لاڳاپن رستي يا ورلي حمل دوران ماءُ مان ابھم کي ٿي پوندڙ انفيڪشن. انفيڪشن ٿيڻ کانپوءِ روڳي جيوڙو رت جي وھڪري ۽ لمفَيٽڪ سرشتي رستي تيزيءَ سان پکڙجي وڃي ٿو. ان جي پھرين نشاني اھڙو ڦٽ (chancre) ٿئي ٿو جيڪو جنسي عضون، گديا، سفري، چپن، نڙيءَ يا آڱرين تي پيدا ٿئي ٿو ۽ 4 ـ 8 ھفتن ۾ ڇٽي وڃي ٿو. ان کانپوءِ ڊٻڙ پيدا ٿي پوي ٿو جيڪو مختصر، اٿلي پوندڙ يا مھينن تائين ھلي سگهي ٿو. ان جي ٻين ممڪن نشانين ۾ ڳنر چڙھي پوڻ (lymph node enlargement)، مٿي جو سور، ھڏن ۾ سور، بک مري وڃڻ، بخار ۽ ٿڪ ٿي سگهي ٿو. چمڙيءَ جي گهميل ھنڌن تي انتھائي وچڙندڙ ٿلها خاڪي يا گلابي چٽا پيدا ٿي سگهن ٿا. ميننجائيٽس (meningitis) به ٿي سگهي ٿي. نشانين پيدا ٿيڻ جي ان مرحلي کانپوءِ بيماري ڪجهه سالن يا ھميشه لاءِ ڇپ ھڻي سگهي ٿي. ڪجهه ڪيس جن جو علاج نٿو ٿئي نيٺ آخري مرحلي کي رسي وسيع پيماني تي ٽشو تباه ڪري ڇڏي ٿي جنھن سان گڏ ڪارڊيوويسڪيولر سفلس (cardiovascular syphilis) ٿي شاه شريان (aorta) متاثر ڪري اينوروزم (aneurysm) ۽ دل جي وال جي بيماري (heart-valve)، نيوروسمفلس (neurosyphilis) سان گڏ دماغ جي وڌندڙ تباھي ۽ فالج ۽ مغزي ڏوريءَ جي تيبيس ڊارسيلس (tabes dorsalis) پيدا ڪري سگهي ٿي. پيدائشي انفيڪشن جي حالت ۾ ان جي نشانين ۾ ڊٻڙ، دائمي طور تي نڪ مان ساه کڻڻ (snuffles)، ھڏي جا نقص، يرقان ۽ جيري ۽ تريءَ جو وڌي وڃڻ شامل ٿين ٿا. ڪيراٽيسس (Keratitis) ۽ آرٿرائيٽس (arthritis) ۽ مخصوص تراکڙو منھن، ڪِليءَ جھڙا (peg-shaped) ڏند ۽ اڳتي ھلي ٻالڪپڻي ۾ سکڻ جون تڪليفون پيدا ٿي سگهن ٿيون. تشخيص لاءِ شينڪر سيرم (chancre serum) يا رت جي تپاسن سان گڏ ٻين جنسي وچڙندڙ بيمارين ھجڻ جي به چڪاس ڪجي ٿي. بادفرنگ جي ھر قسم جو علاج اينٽي بيڪٽيريل (antibacterial) دوائن سان ڪجي ٿو. جن عضون کي اڳ ۾ ئي ڇيھو رسي چڪو ھجي اھي بحال ٿي نٿا سگهن. ھمبستريءَ لاءِ وچڙندڙ بيمارين کان بچاءَ وارا طريقا اختيار ڪرڻ سان بادفرنگ جي بيماريءَ کان بچي سگهجي ٿو. بادفرنگ ۾ مبتلا مريض اوائلي مرحلي ۾ بيماري وچڙائي سگهن ٿا پر بيماريءَ جي ڇپ واري يا آخري مرحلي ۾ نه .