هن اصطلاح کي ڏکڻ آمريڪا جي ملڪن جن جو جاگرافيائي طرح نقشو مخروط (Cone) شڪل جهڙو آهي هي اصطلاح هنن ملڪن جي سياسي ۽ تجاورتي تعلقات کي واضح ڪرڻ لاءِ استعمال ڪيو ويندو آهي، هن خطي ۾ چلي، ارجنٽائين، برازيل، بوليويا، پيراگوائي ۽ يوروگوائي جا ملڪ ۽ آنديان جو علائقو، اميزان (وڏي ندي) ۽ سينسس نديءَ جو نهري نظام اچي وڃي ٿو. جيتوڻيڪ نقشي ۾ برازيل آمريڪي کنڊ ۾ گهڻو ڏاکڻي طرف موجود ناهي، پر سياسي ۽ معاشي طور تي مستحڪم هجڻ ڪري، ”ڏاکڻي چوٽي“ سان سندس تعلقات تمام گهرا آهن. حالانڪه برازيل ۽ ارجنٽائين، چلي ۽ ارجنٽائين جا ملڪي سرحدن جي معاملن تي هڪٻئي سان جهيڙا به رهيا، پر 1990ع ۾ انهن مُلڪن وچ ۾ واپاري ۽ سياسي سهڪار جا ڪيترائي معاهدا ٿيڻ سبب ويجهڙائيون وڌيون. انهن معاهدن منجهان ڏاکڻي آمريڪي مُلڪن وچ ۾ واپاري معاملن ۾ ٿيل سهڪار ”Mercosur“ کي تمام گهڻي اهميت حاصل آهي. هڪ حوالي سان هنن ملڪن جون سرگرميون ۽ تعلقات ڪنهن حد تائين آمريڪا جي حڪومت لاءِ خطري جي گهنٽي طور سمجهيا وڃن ٿا. هنن ملڪن جي گڏيل آبادي ڏکڻ آمريڪا کنڊ جي 49 سيڪڙو بيهي ٿي ۽ اها کنڊ جي واپاري سرگرمين ۾ 56 سيڪڙو حصو وٺي ٿي. هنن ملڪن جا پاڻ ۾ تعلقات مضبوط ڪرڻ ۽ علاقائي سهڪار وڌائڻ ۾ برازيل جو تمام وڏو هٿ آهي. برازيل کي آمريڪي ”سدرن ڪون“ ۾ انتهائي اهم ۽ مرڪزي حيثيت حاصل آهي