هڪ ٻئي جي ويجهو موجود يا پاڙيسري ملڪن جي وچ ۾ ڪن مسئلن جي هجڻ ڪري سيڪيورٽي جي معاملن بابت اڪثر منجهن ڪشمڪش رهندي آهي، جنهن جي ڪري انهن ملڪن جي قيادت طرفان فوجي صلاحيت کي سگهارو ڪرڻ تي وڌ کان وڌ ڌيان ڏنو ويندو آهي. انهيءَ ڏس ۾ جڏهن به ڪجهه ملڪ پنهنجو غلبو ڄمائڻ لاءِ فوجي سرگرميون تيز ڪري ڇڏيندا آهن، ته ٻين ملڪن کي پنهنجي غير محفوظ هجڻ جو خوف رهندو آهي ۽ انهيءَ عدم سلامتيءَ ڀري ڪشمڪش (سيڪيورٽي ڊائيلما) ۾ مستقل رهڻ ڪري امن لاءِ مستقل حل ڳولڻ ۾ منجهانئن هر ملڪ ناڪام ويندو آهي. هن تصور کي سڀ کان پهريان 1950ع ۾ سياسي معاملن جي ماهر ۽ عالم ”جان ايڇ هرز“ سامهون آندو. ”هرز“ مطابق ”سيڪيورٽي ڊائليما“ ڪنهن مخصوص گروپ يا ماڻهن سان لاڳو ناهي، يا هي فقط ڪو نفسياتي عمل ناهي، بلڪ ”عدم تحفظ جو احساس“ هڪ اهڙو نظام آهي، جنهن جو اثر ملڪ ۾ اندر مُختلف گروهن، شعبن ۽ انهن سان وابسته ماڻهن تي پئي ٿو ۽ ڪنهن حد تائين لاقانونيت کي به جنم ڏئي ٿو. ”هرز“ مطابق سرد جنگ جي صورتحال ۽ ٻن سگهارن ملڪن (سوويت ۽ آمريڪا) جو پاڻ ۾ ٽڪراءُ، دُنيا جي ٻين خطن ۽ ملڪن کي پڻ غير محفوظ ڪري ٿو. هڪ ٻئي محقق ۽ سياسي ماهر ”بيري بوُزان“ به هرز“ سان متفق ٿيندي، ”سڪيورٽي ڊائليما“ کي سدائين ”غير محفوظ دنيا “ جي هجڻ جو عنصر ڄاڻايو آهي. هن اصطلاح، تي سڀ کان وڌيڪ تحقيق ”رابرٽ جروِِس“ جي ڪيل آهي. هن سياسي معاملن جي ماهر، جي ڪتابن ۽ مضمونن منجهان سيڪيورٽي جي معاملن ۾ غير يقينيءَ سبب پيدا ٿيل خدشا ظاهر ڪرڻ ۽ امن لاءِ ڪوششون وٺڻ جي سلسلي ۾ سهڪار کي هٿي ڏيڻ جا حل ملن ٿا. ”جروِس“ مطابق جيڪڏهن جنگ معاشي بدحالي کڻي ٿي اچي، ته ڇو نه جنگ ذريعي معاملا حل ڪرڻ تي سوچڻ ڇڏي ڏجي ۽ امن لاءِ ڪوششون وٺجن، ڇاڪاڻ ته ان عمل سان ڪو به ملڪ غير محفوظ هجڻ ۽ ”هميشه خطري هيٺ رهڻ“ واري ڪيفيت ۾ نه رهندو. سندس خيال موجب قومن طرفان ٿيندڙ فوجي سرگرميون، هڪٻئي تي حملي ڪرڻ لاءِ نه، بلڪه فقط بچاءُ جي لاءِ هُجڻ گهرجن فوجي سرگرمين سان فقط حفاظتي انتظامن وارا اُپاءُ جڙيل هجڻ کپن. سياسي حلقن ۾ هن طرح جي تصورن ۽ سوچ کي هڪ فلاسافيءَ طور ته مڃيو وڃي ٿو، پر عملي طور تي ملڪن کي مستقل طور تحفظ ڏيڻ ۽ دنيا ۾ پائيدار امن قائم ڪرڻ لاءِ جامع حل ڳولڻ لاءِ اڃا به وڌيڪ جاکوڙ جي ضرورت آهي