هر ملڪ يا ادارو بُحرانن يا خراب حالتن کان بچڻ لاءِ جيڪا پهرين حڪمت عملي جوڙيندو آهي، اها ڪنهن به قسم جي بُحراني حالتن ۾ وڌيڪ خرابي ۽ شدت کان بچڻ لاءِ ترتيب ڏئي ٿو. ان کان پوءِ ٻي حڪمت عملي انهن حالتن مان مڪمل طور ڇوٽڪارو حاصل ڪرڻ لاءِ جوڙي ٿو. مثال؛ ملڪ’الف‘ جيڪڏهن ملڪ ’ب‘ تي حملو ڪري ٿو ته ملڪ’ب‘ پهريان بچاءُ جي فوجي حڪمت عملي جوڙيندو. جيڪڏهن ملڪ ’ب‘ حملي جو بچاءُ ڪرڻ ۾ ڪامياب ٿي ويو، ته ان کان پوءِ سندس ٻي حڪمت عملي حملو ڪندڙ ملڪ (يعني ملڪ ’الف‘) جي فوج کي گهڻي کان گهڻو نقصان ڏيڻ ۽ مُلڪي سرحدن مان مڪمل طور تي ڌڪي ٻاهر ڪڍڻ جي هوندي آهي. سرد جنگ جي دؤران جنگي ٽيڪنالاجيءَ (نيوڪليائي ۽ ميزائيل وغيره) جي زور تي ”سيڪنڊ اسٽرائيڪ“ وارو نُڪتو سوويت ۽ آمريڪي جنگي حڪمت عملين ۾ شامل هوندو هيو. آئزن هاور (اڳوڻو آمريڪا جو صدر) جي دؤر ۾ هِن حڪمت عمليءَ جي استعمال ٿيڻ جوخدشو به ظاهر ڪيو ويو هو. اهو خيال ڏيکاريو ويو ته جيڪڏهن سوويت يونين ۽ آمريڪا وچ ۾ هٿيارن جي ڪنٽرول بابت ڳالهيون ڪامياب نه ٿيون وڃن، ته نيوڪليئر ٽيڪنالاجي کي ”سيڪنڊ اسٽرائيڪ“طور استعمال ڪيو ويندو