Sciatica

ساياٽڪا

ڪُن رڳ/ ساياٽڪ تنت (sciatic nerve) سان لاڳاپيل سور يا اھنج. عام طور تي سور چتڙن ۽ دُڏ کي متاثر ڪري ٿو ته ورلي ٽنگ ۽ پير ڏانھن وگهري ٿو. شديد حالتن ۾ سور سان گڏ متاثر حصو سُن يا ڪمزور به ٿي وڃي ٿو. ان جو گهڻو عام ڪارڻ نڪري پيل بين ـ الريڙه (ريڙھين جي وچواري ) جي ڊسڪ جو ان تنت جي پاڙ تي دٻاءُ لڳائڻ ٿئي ٿو (ڏسو، disc prolapse). ٻين ڪارڻن ۾ ڪنھن مشڪ جي ڳڍڙي، ھڪ ڊگهي عرصي تائين اڍنگي طريقي سان ويھڻ يا ورلي ڪنھن ڳوڙھيءَ جو تنت تي دٻاءُ لڳائڻ ٿئي ٿو. ڪڏھن ڪڏھن، اصل ڪارڻ جي ڄاڻ نٿي پوي. علاج لاءِ انلجيسڪ (analgesic) دوائون ڏجن ٿيون. جيتري قدر ممڪن ٿي سگهي چرپر ڪرڻ ضرري ٿئي ٿي، جيتوڻيڪ سور شديد ھجي ٿو تنھن ھوندي به ڪجهه وقت لاءِ بستري جو آرام ڪارائتو ٿئي ٿو، جڏھن ته ڊگهي آرام سان حالت بدتر ٿي سگهي ٿي. فزيوٿراپي (physiotherapy)، آسٽيوٿراپي (osteopathy) يا ڪيروپريڪٽڪ (chiropractic) ڪن حالتن ۾ فائديمند ٿي سگهي ٿي. صحتمند بيھڪ ۽ وزن برقرار رکڻ ضروري ٿئي ٿو.