هي اصل ۾ لاطيني ٻوليءَ جو هڪ اصطلاح آهي، جيڪو عوام لاءِ هڪ قانون طور سُڃاتو وڃي ٿو. هن قانون موجب هر ملڪ جي حڪومت کي فطري اجازت آهي ته اُها پنهنجي عوام جي صحت، سيڪيورٽي ۽ ملڪي سرحدن جي بچاءَ خاطر هر ممڪن اُپاءَ ۽ ڪوشش وٺي. ان ڏس ۾ جيڪڏهن ضرورت پوي ته ڏوهارين کي سزائون ڏيڻ سميت ملڪي مفادن کي سامهون رکندي ڪڙا ۽ سخت فيصلا به ڪري. هن اصطلاح جي پسمنظر ۾ ٿيل ڪافي مثال اڄ به اسان جي سامهون موجود آهن. ويجهڙائيءَ ۾ سوائن فلو (هڪ وچڙندڙ بيماري) جي ڦهلجڻ وقت ڏکڻ آمريڪا سان لاڳاپيل مُسافرن لاءِ ڪيترن ئي ملڪن جي هوائي اڏن تي ڪافي مسئلا پئدا ٿيا، ڇاڪاڻ ته سوائن فلو جو وائرس دراصل ڏکڻ آمريڪا جي ملڪ برازيل ۾ سڀ کان پهريان مليو، اُتان جي عوام جي پاڙيسري مُلڪن ڏانهن سفر ۽ بعد ۾ دُنيا جي ملڪن ۾ اچ وڃ جي ڪري اهو تيزيءَ سان پکڙجڻ لڳو. ان صورتحال کي ذهن ۾ رکندي ڪيترن مُلڪن ڏکڻ آمريڪا جي شهرين کي پنهنجي ملڪ ۾ اچڻ کان منع ڪري ڇڏيو يا قانون سخت ڪري ڇڏيا. ڪجهه ملڪن ته برازيل ۽ ٻين ڏکڻ آمريڪا جي حُڪومتن کي پابند ڪيو ته اُهي پنهنجن هوائي اڏن تي سندن مُلڪن سان لاڳاپيل شهرين جي سفر کان اڳ رت جي باقائده چڪاس ڪرائڻ، اهڙي تقاضا ڪندڙ ملڪن پنهنجن شرطن تي عمل درآمد کان پوءِ ڏکڻ آمريڪي مُلڪن جي مسافرن کي پنهنجي ملڪي حدن ۾ اچڻ جي اجازت ڏني