Rhesus incompatibility

رِي.سس ـ اِن.ڪام.پيٽي. بلٽي

رِويسس نيگيٽو حامله عورت ۽ سندس ابھم جي رت جي گروپ جو اڻ ٺھڪڻ/ اڻ ميلو ھجڻ. ڪن حالتن ۾ اھڙو اڻ ٺھڪڻ، نئين ڄاول ابھم ۾ ھيمولائيٽڪ ڊزيز (haemolytic disease) پيدا ڪري ٿو. آر ايڇ سسٽم جو بنياد رت ۾ ڪيترن عنصرن جي ھجڻ يا نه ھجڻ تي مدار رکي ٿو جن ۾ وڌ ۾ وڌ اھم ھڪ مادو ڊي اينٽيجين (D antigen) ٿئي ٿو. آر ايڇ پازيٽو رت ۾ ڊِي اينٽيجين موجود ھجي ٿي ۽ آر ايڇ نيگيٽو ۾ موجود نٿي ھجي. رت جو گروپ ڪھڙي قسم جو آھي ان جو فيصلو جينون (genes) ڪن ٿيون. رِيوسس ناموافقت تڏھن پيدا ٿئي ٿي جڏھن آر ايڇ نيگيٽو عورت پنھنجي ابھم جي آر ايڇ پازيٽو رت سان ڄمڻ دوران لاڳاپي ۾ اچي ٿي. عام طور تي اھڙين حالتن ۾ پھرين حمل دوران، ابھم جي آر ايڇ پازيٽو ھجڻ سان ڪو مسئلو پيدا نٿو ٿئي ۽ ممڪن ٿئي ٿو ته اھڙي عورت اينٽيجين ڊيءَ خلاف اينٽيباڊيون (antibodies) پيدا ڪري سگهي، جڏھن ته ان کانپوءِ واري حمل ۾ ٻار جي آر ايڇ پازيٽو ھوندي اھي اينٽيباڊيون ناڙو ٽپي ابھم جي رت جي ڳاڙھن سيلن تي حملو ڪري سگهن ٿيون. اھڙيءَ ڪنھن به آر ايڇ نيگيٽو عورت کي سينسيٽائيز ڪري سگهجي ٿو جيڪڏھن کيس ڇڪي آئي ھجي، ڪھائي ٿي ھجي يا ايمنيئوسينٽيسِس (amniocentesis) ڪرائي ھجي جنھن دوران ابھم جو آر ايڇ پازيٽو رت ماءُ جي گردشي سرشتي ۾ داخل ٿي وڃي ٿو.