Retinoblastoma

ري.ٽي.نو.بلاس.ٽوما

تنتي پردي (retina) جي ڪينسر جيڪا ابھمن کي متاثر ڪري ٿي. ھن تڪليف جي پھرين نشاني ٽيڏائپ (squint) ٿي سگهي ٿي جيڪا متاثر اک جي نابينائپ يا ماڻڪيءَ (pupil) جي ظاھر ٿيندڙ اڇاڻ ٿي سگهي ٿي. شروعات ۾ علاج نه ڪرائڻ سان ريٽيوبلاسٽوما دوڏي (orbit/eye socket) ۽ ڏسڻيءَ تنت (optic nerve) رستي مغز ڏانھن پکڙجي سگهي ٿي. ريٽينوبلاسٽوما جو ڪارڻ موروثي ٿئي ٿو. جن فردن کي ھن قسم جي ڪينسر ٿئي ٿي انھن جي ڪروموسوم (chromosome) نمبر13 ۾ ھڪ حصي جي کوٽ ٿئي ٿي. متاثر ڪٽنبن جي نون ڄاول ابھمن جي اکين جي باقاعديءَ سان تپاس ڪبي رھجي ٿي ۽ متاثر خاندانن جي جن والدين کي ان جي ٿيڻ جو امڪان ٿئي ٿو تن کي جينيٽڪ ڪائونسلنگ (genetic counselling) ڪرڻ گهرجي. ريٽينوبلاسٽوما جي علاج جو مدار ان تي ٿئي ٿو ته ڪينسر ڪيتري وگهري چڪي آھي. جنھن لاءِ ليزري علاج (laser treatment)، ڪرايوٿراپي (cryotherapy)، ٿرموٿراپي (thermotherapy) ريڊيوٿراپي (radiotherapy)، ڪيموٿراپي (chemotherapy)، آپريشن يا گاڏڙ علاج ڪجن ٿا. جيڪڏھن ڳوڙھي وڏي ھجي ۽ اک ڪم ڪري نه سگهندي ھجي ته نيڪال به ڪرڻي پوي ٿي.