سياست جي سائنس ۾ ڪتب ايندڙ هڪ اصطلاح جيڪو، ان شعبي جي ٻن نظرين ”حقيقت پسندي“ (Realism) ۽ هاڪاريت (Positivism) کي رد ڏيندي، زور ڏئي ٿو ته معلوماتي تفصيلن (Data) ۾ تجربي سرگرمين ذريعي، انهن قدرن کي بيان نٿو ڪري سگهجي، جيڪي ڊگهي پسمنظر منجهان اُسري عوام تي اثر انداز ٿين ٿا. ڇاڪاڻ جو انهن تفصيلن (Data) ۾ انساني نفسيات، احساسن ۽ ارتقائي پسمنظرن کان سواء ِ، انساني سماج سان سندس لاڳاپن کي به سمجهڻ ناممڪن آهي. هن قسم جو فڪري رويو عام طرح سان عورتا- واد (Feminism) ، جديديت پڄاڻا( Postmodernism) ۽ ڇيدڪاريءَ واري نظريي (Critical Theory) ذريعي وضاحت ۽ قبوليت سان بيان ڪيو وڃي ٿو. ان ڪري جو اهو نظريو عام رواجي معلومات مطابق پاليسيون جوڙڻ بجاءِ واقعن ۽ معاملن جي تاريخي تسلسل تي نظر رکڻ جي وڪالت ڪري ٿو. شايد پنهنجي وڌيڪ ”عملي“ رخ نه هئڻ ڪري ، هيءَ نظريو آمريڪي علمي حلقن ۾ ڪا گهڻي پذيرائي نٿو رکي ۽ ان کي پراڻي دور جو ”ڳالهير“ نظريو سمجهيو وڃي ٿو. بهرحال ان هوندي به اولهه يورپ ۽ دنيا جي ٻين ڪيترن علائقن ۾، پرڏيهي پاليسيءَ جي ترتيب دوران هن نظريي جي اهيمت اڄ به مڃي وڃي ٿي