Rectum, cancer of

ريڪٽم ـ ڪينسر ـ آف

سفري ۾ ڪينسري ڳوڙھيءَ جو ھجڻ. ان جي ڪارڻ جي ڄاڻ ڪونھي پر سمجهيو وڃي ٿو ته غذائي ۽ موروثي پھلون جو ان تي اثر ٿئي ٿو. شروعاتي نشانين ۾ پيٽان ويھڻ سان سفري جي رتھير (rectal bleeding)، پيٽان ويھڻ جي عادتن ۾ فرق، دست يا قبضي ۽ وزن جي گهٽتائي ٿين ٿيون. اڳتي ھلي سور به ٿي سگهي ٿو. علاج نه ڪرائجي ته ڪينسر سبب شديد رتھير، سور ۽ آنڊو ٻنججي سگهي ٿو. ڪينسر جسم جي ٻين عضون ڏانھن به وگهري سگهي ٿي. سفري تپاسڻ (rectal examination) سان ڪينسر جي ڄاڻ رکي سگهجي ٿي ۽ ان جي پڪ ڪرڻ لاءِ پروڪٽواسڪوپي (proctoscopy) يا سگموئيڊواسڪوپي (sigmoidoscopy) ۽ بايوپسي (biopsy) ڪجي ٿي. سفري جي ڪينسر جي ڇنڊڇاڻ فيڪل آڪلٽ بلڊ ٽيسٽ رستي ڪري سگهجي ٿي (ڏسو، occult blood, faecal). عام طور تي علاج، آپريشن رستي ڪجي ٿو. مٿين سفري ھجڻ جي حالت ۾ متاثر حصو ۽ آنڊي جو آخري حصو ڪڍي آنڊي جا ٻه آزاد ڇيڙا سبي ڇڏجن ٿا. ان جي جلد ڇٽڻ لاءِ ھڪ عارضي ڪولوسٽومي (colostomy) به ڪري سگهجي ٿي. جيئن ته ڪرفتيءَ جو نيڪال نٿو ھجي تنھنڪري ھڪ دائمي ڪولوسٽومي ٺاھي ڇڏجي ٿي. آپريشن بجاءِ يا ان سان گڏ ريڊيوٿراپي (radiotherapy) ۽ ڪينسر ختم ڪرڻ جون دوائون به ڏئي سگهجن ٿيون. جن جو سفري جي ڪينسر جو علاج ڪجي ٿو انھن مان 40 سيڪڙي تائين مريض 10 سال يا وڌيڪ زنده رھي سگهن ٿا.