Prostate, enlarged

پراسٽيٽ ـ اِن.لار.جِڊ

پراسٽيٽ غدود جي اندرين حصي جي سائيز ۾ واڌ جنھن کي بينائين پراسٽيٽڪ ھائپرپلاسيا (benign prostatic hyperplasia) به 50 سالن کان مٿي عمر جي مردن ۾ گهڻي عام ٿئي ٿي، جنھن جي ڪارڻ جي ڄاڻ ڪونھي. وڌي ويل پراسٽيٽ، پيشاب نليءَ (urethra) تي دٻاءُ وجهي منجهس بگاڙ پيدا ڪري ٿو نتيجي ۾ مثانو مڪمل پيشاب نيڪال ڪري نٿو سگهي (ڏسو، urine retention) جنھنڪري ڦوڪجي پيٽ سڄائي وجهي ٿو. ان کانسواءِ ممڪن ٿئي ٿو ته پيشاب روڪي نه سگهجي ۽ ھر ھر ايندو رھي (ڏسو، urination, frequent). پراسٽيٽ جي واڌ سفري جي تپاس (rectal examination) رستي جاچجي ٿي. تپاسن ۾ رت جي تپاس، الٽراسائونڊ اسڪيننگ (ultrasound scanning)، يوروگرافي (urography) ۽ پيشاب جي وھڪري جي زور جي رڪارڊنگ شامل ٿئي ٿي. پراسٽيٽ غدود جي ھلڪيءَ واڌ لاءِ علاج جي ضرورت نٿي ٿئي جڏھن ته شديد واڌ جي صورت ۾ عام طور تي پراسٽيٽيڪٽومي (prostatectomy) ضروري ٿئي ٿي. نه ته نعم ابدل طور الفاـ بلاڪر (alpha-blocker) يا اينٽي ـ اينڊروجن (antiandrogen) رستي علاج ڪري سگهجي ٿو.