Polyhydramnios

پالي.ھائڊ.رام.نيئوس

حمل دوران ابھم جي چوگرد پشمي پاڻيٺ (amniotic fluid) جو حد کان وڌيڪ ھجڻ جيڪو 250 حملن مان ھڪ ۾ ٿئي ٿو جنھن جو عام طور تي ڪو سبب نٿو ھجي. ورلي، اھا صورتحال تڏھن پيدا ٿئي ٿي جڏھن ابھم ۾ ڪنھن نقص سبب عام رواجي طريقي سان ڳھي سگهڻ ناممڪن ٿي پوي ٿو يا جڏھن حامله کي ڊائبِيٽيز ميلائيٽس (diabetes mellitus) ھجي ٿي. عام طور تي واڌو پشمي پاڻيٺ، حمل جي ٻئي اڌ ۾ گڏ ٿي اٽڪل 32 ھفتي کان نشانيون پيدا ڪرڻ شروع ڪري ٿي. مکيو نشاني/تڪليف پيٽ جو اھنج ٿئي ٿو. ٻين ممڪن تڪليفن ۾ ساه جي مونجهه ۽ ٽنگن جي سوڄ ٿئي ٿي. عام طور تي ڳڀيرڻ جي جيتري وڏي ھجڻ جي اميد ڪجي ٿي ان کان وڏي ھجي ٿي. ورلي، پاڻيٺ تيزي سان گڏ ٿي پيٽ جو سور، ساه جي مونجهه، اوڪارا، الٽي ۽ ٽنگ جي سوڄ پيدا ڪري وجهي ٿي. نتيجي ۾ وقت کان اڳ ۾ ويم جا سور شروع ٿي سگهن ٿا. جيتوڻيڪ جسماني تپاس مان اھڙيءَ حالت جو اندازو لڳائي سگهجي ٿو تنھن ھوندي به الٽراسائونڊ ڪرڻ ضروري ٿئي ٿو. ھلڪيءَ تڪليف جي حالت ۾ رڳو آرام ڪرڻ ضروري ٿئي ٿو. گهڻي شديد حالت ۾ سئي رستي پشمي پاڻيٺ خارج ڪري سگهجي ٿي. حمل جي آخري ڏينھن ۾ ويم جا سور شروع ڪرائڻ ضروري ٿي سگهن ٿا.