Polyarteritis nodosa

periarteritis nodosa

(پولي.آر.ٽي.راءِ.ٽس ـ نوڊوسا) وچٿري سائيز جي شريانن جي ورلي ٿيندڙ ھڪ بيماري جنھن کي پيري آرٽيرائيٽس نوڊوسا (periarteritis nodosa) نالي سان به سڏجي ٿو، ان ۾ شرياني ڀتين جا حصا سوزشي، ڪمزور ۽ انُورزم (aneurysms) جو ممڪن شڪار ٿي سگهن ٿا. اھڙي حالت جي شدت جو مدار متاثر شريان تي ٿئي ٿو ته اھي ڪيتريون متاثر ۽ ڪمزور ٿي چڪيون آھن. ان جو ڪارڻ اِميون سرشتي (immune system) ۾ خلل لڳي ٿو جنھن کي ورلي ھيپيٽائيٽس بي (hepatitis B) جو وائرس چوڪ ڏئي ٿو. گهڻا عام بالغن ۽ عورتن کان وڌيڪ مرد متاثر ٿين ٿا. پولي آرٽرائيٽس نوڊوسا جي شروعاتي نشانين ۾ بخار، مشڪن ۽ سنڌن جو ڏکڻو ٿي پوڻ ۽ عام اگهائپ ، بک مري وڃڻ، وزن گهٽجي وڃڻ ۽ ورلي اعصابي سور ٿين ٿيون. ھاپرٽينشن (hypertension)، چمڙيءَ جي السر ۽ گينگرين (gangrene) به ٿي سگهي ٿي. ڪورونري شريانون متاثر ٿي پون ته مايوڪارڊيئل انفارڪشن (myocardial infarction) ٿي سگهي ٿو. ڪيترن مريضن کي پيٽ جو سور، اوڪارا، الٽي، دست ۽ پيٽان رت به اچي سگهي ٿو. بيماريءَ جي تشخيص بايوپسي (biopsy)، ايم آر آءِ (MRI) ۽ اينجيوگرافيءَ (angiography) رستي ڪجي ٿي. ڪورٽيڪو سٽيروائڊ (corticosteroids) ۽ ورلي حالتن ۾ اِميونوسپريسنٽَ (immunosuppressants) ڏيڻ سان گهٽ ۾ گهٽ 5 سالن تائين زنده رھي سگهجي ٿو. علاج بنا رڳو ڪجهه مريض ايترو وقت زنده رھي سگهن ٿا.