اهڙي حڪومت، جنهن ۾ مهذب سماج سڀ واسطيدار حلقا ۽ مخالف سياسي ڌُر به پنهنجو هاڪاري ڪردار ادا ڪري ٿي ۽ مُلڪ جي هر سياسي جماعت کي حڪومتي معاملن ۾ بهتري آڻڻ جو حق ٿئي ٿو. اهڙي طرح سان چئي سگهجي ٿو ته هي هڪ اهڙو سياسي سرشتو آهي، جنهن ۾ ڪنهن به حوالي سان ڪو هڪ فرد يا آمر حڪومتي وهنوار نه ٿو هلائي، بلڪه هڪ حڪومتي سرشتي ۾ جڏهن ڪاروهنوار مُختلف ڌرين جي صلاح ۽ سهمتيءَ سان هلي، ته اهڙي رياست يا ملڪ کي سهڪاري رياست (Polyarchic State) طور سڃاتو وڃي ٿو. يورپي ملڪن ۾ ڪيترين رياستن ۾ هن قسم جي حڪومت قائم ڪيل هوندي آهي. يورپ ۾ ٿيل اهڙن ڪامياب تجربن کان پوءِ سياسي دانشورن طرفان پنهنجن تجزين ۽ تحقيق ۾ عام طرح اهو خيال ظاهر ڪيو ويو، ته اهڙي قسم جون حڪومتون ڪنهن آمراڻي حڪومت کان وڌيڪ امن پسند، سلامتي گهُرندڙ ۽ انساني ڀلائيءَ وارن روين کي ترجيح ڏيڻ واريون هونديون آهن، ڇاڪاڻ ته انهيءَ قسم جي حڪومتن ۾ عوام، پاليسيون ٺاهيندڙن کي ڪنهن به سخت پاليسي ٺاهڻ کان روڪي سگهندو آهي. ڪنهن آمر جي حڪومت هيٺ عوام کي حڪومتي پاليسين جي جوڙجڪ ۾ دخل ڏيڻ جي اجازت نه هوندي آهي. ان ڏس ۾ جديد دور ۾ ٿيل تحقيق ۾ بهرحال اهڙين ڳالهين جي نفي ٿيل آهي. جديد کوجنا موجب هر حڪومت، پاليسيون ٺاهيندڙن کي وقت ۽ حالتن جي مطابق پاليسيون ٺاهڻ جون هدايتون ڏيندي آهي، بعد ۾ هر حڪومت جوڙيل پاليسيءَ کي گهڻي قدر لاڳو ڪرڻ لاءِ پنهنجا وسيلا ڪتب آڻيندي آهي پوءِ ڀلي ته اهي پاليسيون ڪيتريون به سخت ڇو نه هجن ۽ سندن ظاهري رُخ انتهائي اڻ وڻندڙ ڇو نه هجي