Placental abruption

پلي.سين.ٽل ـ ابرپشن

ٻار ڄمڻ کان اڳ ڳڀيرڻ مان اؤر جو مڪمل يا جزوي طور تي الڳ ٿي وڃڻ. ان جي ڪارڻ جي مڪمل ڄاڻ ڪونھي پر پليسينٽل اَبرپشن انھن عورتن ۾ گهڻي عام ٿئي ٿي جن کي ھڪ ڊگهي عرصي کان ھائپرٽينشن رھي ٿو يا اڳين حمل ۾ رھيو آھي يا ڪيترا ڀيرا حمل ٿيو آھي. تماڪ ڇڪڻ، گهڻو الڪوحل پيئڻ ۽ ڪوڪين جو استعمال ڪرڻ به پليسينٽا اَبرپشن جو خطرو وڌائي سگهن ٿا. ان جون نشانيون/ تڪليفون اوچتو شروع ٿين ٿيون جن جو مدار ان ڳالهه تي ٿئي ٿو ته اؤر ڪيتري قدر ڳڀيرڻ مان الڳ ٿي چڪي آھي. ان آھر، گرڀ ناليءَ مان ھلڪي کان ججهي رتھير (bleeding) ٿي سگهي ٿي جيڪڏھن اؤر مڪمل طور تي الڳ ٿي چڪي آھي ته رتھير شديد ٿي سگهي ٿي، پيٽ ۾ ڳڍڙيون يا پٺيءَ ۾ سور، پيٽ جو لاڳيتو شديد سور ۽ ابھم جي چرپر گهٽجي ويل ٿي سگهي ٿي. جيڪڏھن رتھير بند ٿي نه سگهي يا وري ٿي پوي ته ٻار ڪيرائڻ ضروري ٿي سگهي ٿو (ڏسو، induction of labour). اؤر جي معمولي الڳ ٿيڻ جي حالت ۾ ان جو عام طور تي علاج اسپتال ۾ بستري جو آرام ڪرڻ ٿئي ٿو، عام طور تي پليسينٽل اَبرپشن جي گنڀير حالت ۾ ھنگامي سيزيرين سيڪشن (caesarean section) رستي ابھم جي زندگي بچائڻ ضروري ٿي پوي ٿي.جنھن لاءِ ورلي رت به ھڻائڻي پوي ٿي.