Pancreas, cancer of

پئن.ڪر.ي.ئاس ـ ڪينسر ـ آف

لبلبي جي ايڪسوڪرائين ٽشوءَ جي ڪينسري ڳوڙھي. گهٽ تعداد ۾ ان جو ڪارڻ ناقص جين ٿئي ٿي جڏھن ته عام طور تي ان جي ڪارڻ جي ڄاڻ نٿي ھجي جيتوڻيڪ تماڪ ڇڪڻ ۽ سڻڀ يا الوڪحل جو گهڻو استعمال ان جي پيدا ڪرڻ ۾ مددگار پھلو ٿي سگهن ٿا. ان جي تڪليفن ۾، پيٽ جي مٿين حصي جو سور، بک مري وڃڻ، وزن گهٽجي وڃڻ ۽ يرقان (jaundice) ٿي سگهي ٿو. ان کانسواءِ بدھاضمو، اوڪارا، الٽي، دست ۽ ٿڪ به ٿي سگهن ٿا. گهڻين حالتن ۾ تيستائين تڪليفون پيدا نٿيون ٿين جيستائين ڪينسر جسم جي ٻين حصن ڏانھن وگهري نٿي وڃي. عام طور تي تشخيص لاءِ الٽراسائونڊ اسڪيننگ (ultrasound scanning)، سي ٽي اسڪيننگ (CT scanning) يا ايم آر آءِ (MRI) يا اي آر سي پي (ERCP) ڪجي ٿي. شروعاتي مرحلن ۾ پينڪريئاٽئڪٽومي (pancreatectomy)، ريڊيوٿراپي (radiotherapy) ۽ اينٽي ڪينسر دوائن سان فائدو ٿي سگهي ٿو. آخري مرحلن ۾ سواءِ پيليٽِو علاج (palliative treatment) جي ٿورو ڪجهه ڪري سگهجي ٿو.