Ovary, polycystic

او.وَري ـ پالي.سس.ٽڪ

ان بيماريءَ کي اسٽين ـ ليوينٿال سنڊروم (Stein–Leventhal syndrome) نالي سان به سڏجي ٿو جنھن جي عام نشاني ماھواري بي قاعدي ۽ گهٽ وڌ اچڻ (oligomenorrhea) يا ماھواري نه اچڻ (amenorrhoea)، اَويجهائپ (infertility)، ججها وار پيدا ٿيڻ (hirsutism)، موھيڙا ۽ ٿلهائپ ٿئي ٿي. عام طور تي آنيدانيءَ ۾ گهڻيون سسٽون ٿين ٿيون. ڪيترين عورتن کي پاليسسٽڪ اووَرين ھوندي به عام عمر ۾ ماھواري اچي ٿي پر ھڪ ٻن سالن کانپوءِ اھا انتھائي بي قاعدي ٿي پوءِ بند ٿي وڃي ٿي. ھن بيماريءَ جي اصل ڪارڻ جي ڄاڻ ڪونھي پر اھا ليوٽِينائيزنگ ھارمون (luteinizing hormone /LH) ۽ ٽيسٽوسٽيرون (testosterone) ۽ انسولن جي مزاحمت (جنھن سبب جسم جا سيل انسولن لاءِ مزاحمت رکندڙ ۽ لب لبه مان حد کان وڌيڪ انسولن پيدا ڪرائيندڙ ته جيئن کوٽ پوري ٿي سگهي) سان عام رواجيءَ کان وڌيڪ سطحن سان لاڳاپيل ٿئي ٿي. علاج جو مدار تڪليف آھر ڪجي ٿو جنھن ۾ واڌو وزن گهٽائڻ، ميٽفارمن (metformin) ڏيڻ ته جيئن اِنسولن لاءِ حساسيت وڌائي سگهجي، ھارمون (جھڙوڪ: حمل روڪ گوريون، پروجيسٽوجن ۽ اينٽي اينڊروجن دوائون) ته جيئن ٽيسٽوسٽيرون جو اثر ختم ڪري ماھواريءَ جي بي قاعدگين ۽ موھيڙن جو علاج ٿي سگهي، اَويجهه لاءِ ڪلوميفين (clomifene) ۽ ججهن وارن لاءِ ڊپليٽوريز (depilatories) يا اليڪٽرولائيسز (electrolysis) استعمال ڪجي ٿي. عام طور تي پاليسسٽڪ اوورِيز جسم ۾ ايسٽروجن جي مٿاھين سطحن سان لاڳاپيل ٿين ٿيون جيڪي اينڊوميٽريل (endometrial) ڪينسر ٿيڻ جا خطرا وڌائي ڇڏين ٿا (ڏسو، uterus, cancer of).