Ovarian cyst

او.وَي.ريئن سسٽ

آنيدانيءَ (ovary) جي سِسٽ/ غيرمعمولي پاڻيٺ سان ڀريل سوڄ. آنيدانيءَ جون سسٽون عام ۽ ڪيترين حالتن ۾ اَڪينسري (noncancerous) ٿين ٿيون. انھن ۾ گهڻي عام قسم جي فوليڪيولر سسٽ (follicular cyst) ٿئي ٿي جنھن ۾ آنو پيدا ڪندڙ فوليڪل واڌ ڪري پاڻيٺ سان ڀرجي وڃي ٿي. ان کانسواءِ سِسٽون ڪارپس ليوٽيم (corpus luteum) ۾ به پيدا ٿي سگهن ٿيون جيڪو ٽشوئن جو ھڪ اھڙو مادو ٿئي ٿو جيڪو آنجڻ (ovulation) کانپوءِ فوليڪل مان پيدا ٿئي ٿو. سسٽون ٻن قسمن جون؛ ڊرموائڊ سسٽون (dermoid cysts) ۽ ڪينسري سسٽون (cancerous cysts) ٿين ٿيون (ڏسو، ovary, cancer of). عام طور تي آنيدانين جون سسٽون تڪليف پيدا نٿيون ڪن ته ڪي پيٽ جو اھنج، ھمبستريءَ دوارن درد يا ماھواريءَ جون بيقاعدگيون جھڙوڪ: ماھواري نه اچڻ (amenorrhoea)، ماھواري حد کان وڌيڪ اچڻ (menorrhagia) يا ماھواري تڪليف سان اچڻ (dysmenorrhoea) پيدا ڪن ٿيون. جيڪڏھن ڪنھن سسٽ ۾ مروڙ اچي يا ڦاٽي پوي ته پيٽ جو شديد سور، اوڪارا ۽ بخار ٿي سگهي ٿو. جنھن لاءِ آپريشن ڪرڻي پوي ٿي. اھو به ممڪن ٿي سگهي ٿو ته عام طور تي نھائين جي تپاس (pelvic examination) دوران آنيدانيءَ جي ڪنھن سسٽ ھجڻ جي ڄاڻ پوي ۽ ان جي ھنڌ ۽ سائيز جي الٽراسائونڊ (ultrasound) يا ليپرواسڪوپي (laparoscopy) رستي پڪ ڪجي. گهڻين حالتن ۾ آنيدانين جون ساديون سسٽون ـ سنھي تھه واريون يا پاڻيٺ ڀريل پنھنجو پاڻ ختم ٿي وڃن ٿيون. جڏھن ته پيچيده (جھڙوڪ: ڊرموائڊ سسٽون) سسٽن کي گهڻي ڀاڱي آپريشن رستي خارج ڪرڻو پويٿو. جيڪڏھن آنيدانيءَ جا ڪا سسٽ خاص طور تي وڏي ھجي ته ممڪن ٿئي ٿو ته آنيداني کي نيڪال ڪرڻو پوي (ڏسو، oophorectomy).