”ٿڌي لڙائيءَ“ جي ڏينهن ۾ استعمال ٿيندڙ هن اصطلاح موجب ٻن عظيم عالمي نيوڪليائي طاقتن جي وچ ۾ ٿيندڙ ڪنهن به حادثاتي نيوڪليائي جنگ جي نتيجي ۾، ڌرتيءَ جي گولي تي ماحولياتي ۽ موسمياتي حوالي سان سڄو وايو منڊل تبديل ٿي ويندو. هن وضاحت ذريعي اهو ثابت ڪرڻ جي ڪوشش ڪئي وئي، ته نيوڪليائي هٿيارن جي نشانن تي لڳڻ بعد جيڪي مٽيءَ جا وڏا طوفان پيدا ٿيندا، اُهي سج جي ڪرڻن کي مُختلف مٽيءَ جي تهن ذريعي مُڪمل طور ڍڪي ڇڏيندا، جنهن جي نتيجي ۾ ڌرتيءَ تي گرميءَ جو پد بالڪل هيٺ ڪري پوندو. جيتوڻيڪ ”نيوڪليائي سياري“ جي اصطلاح بابت ڪيل وضاحتون ڪن به سائنسي حقيقتن يا ثابت ٿيل تجربن جي بنياد تي نه، پر انهن اندازن تي بيٺل آهن، جيڪي مُختلف جنگين ۾ دُنيا جي شهرن مٿان روايتي هٿيارن ذريعي ٿيل بمبارين ۽ ٻرندڙ جبلن جي تباهه ڪارين منجهان اخذ ڪيل نتيجن تي قائم ڪيا ويا. ان هوندي به ”نيوڪليائي سياري“ واري تصور اُسريل ملڪن جي عوام ۽ ٻين باخبر حلقن ۾ ڳڻتيءَ جي لهر پيدا ڪري ڇڏي ۽ 1980ع جي ڏهاڪي ۾ ان بابت وڏا بحث مباحثا ٿيا. ان ڪري سڄي دُنيا جي باشعور حلقن آمريڪا ۽ سوويت يونين طرفان نيوڪليائي ٽيڪنالاجيءَ کي فوجي مقصد لاءِ استعمال ڪرڻ واري وڌندڙ رُجحان جي نندا ڪئي. اهو دراصل عالمي سطح تي وڌيل عوامي دٻاءُ جو نتيجو هو، جو 1985ع ۾ آمريڪي صدر رونالڊوريگن جي انتظاميا هوڏ واري پاليسيءَ تان لهي، گورباچوف جي قيادت ۾ روسي قيادت سان ڳالهيون شروع ڪيون.