اقوام متحده ۾ جوهري هٿيارن کي ختم ڪرڻ جو مطالبو گهڻي وقت کان ٿيندو رهيو هو. 12 جون 1968ع تي ان ڏس ۾، اقوام متحده هڪ قرارداد پاس ڪئي، جنهن جو مقصد ايٽمي هٿيارن جي ڦهلاءَ کي روڪڻ هيو. 92 ملڪن ان ٺاهه جي حق ۾ ۽ 4 ملڪن مخالفت ۾ ووٽ ڏنو، جڏهن ته 22 ملڪ اڻ - ڌُريا رهيا. هيءُ ٺاهه 5 مارچ 1970ع تي باقاعده عمل ۾ آيو. هن ٺاهه تحت ايٽمي طاقتن واعدو ڪيو، ته اُهي ڪنهن به غير ايٽمي ملڪ کي پنهنجي ايٽمي ٽيڪنالاجي نه ڏيندا. ان ٺاهه تحت غيرايٽمي ملڪن پڻ اهو واعدو ڪيو، ته اُهي نيوڪليائي ٽيڪنالاجيءَ ذريعي ڪڏهن به ايٽمي هٿيار نه ٺاهيندا. هن ٺاهه جا ٽي مُک اصول آهن: (1)نيوڪليائي هٿيار نه ڦهلائڻ. (2) نيوڪليائي هٿيارن جي ڊوڙ ختم ڪرڻ ۽ (3) پُرامن طريقي سان ائٽمي توانائيءَ جو استعمال ڪرڻ. اڄ تائين دُنيا جي 189 ميمبرن جون هن ٺاهه تي صحيون ڪيون آهن. چار غير ميمبر مُلڪن ۾ انڊيا، پاڪستان، اسرائيل ۽ اُتر ڪوريا شامل آهن، جن کليا کُلايا ائٽمي تجربا (اسرائيل کان سواءِ) ڪيون آهن. هيءُ معاهدو آئرلئنڊ ۽ فنلئنڊ طرفان متعارف ڪرايو ويو ۽ انهن ملڪن معاهدي تي ابتدائي صحيون به ڪيون.