هيءُ هڪ مقصد يا نيتي آهي، جنهن ذريعي هٿيارن جي ڦهلاءَ جي واپار ۽ ڊوڙ ۾ شامل ڌُرين وٽ موجود هٿيارن ۽ فني مهارت کي، ٻين مُلڪن تائين پهچائڻ واري عمل کي روڪڻ لاءَ اُپاءُ وٺبا آهن. سرد جنگ دوران هٿيارن جي اهڙي ڦهلاءُ، خاص ڪري نيوڪليائي هٿيارن جي ڦهلاءَ کي روڪڻ لاءِ مُعاهدي (N.P.T) ڪرڻ تي زور ڏنو ويو، ڇاڪاڻ ته انهيءَ طريقي سان ئي دُنيا خوفناڪ هٿيارن جي ڦهلجڻ کان بچي پئي سگهي. پر وقت گُذرڻ ۽ خاص طور نار واري جنگ (1991ع) ۾ محسوس ٿيو، ته دُنيا جي قومن ان معاهدي ڪرڻ کانپوءِ نه رڳو اُن تي عمل نه ڪيو آهي، پر ڪن ٻين رُخن ۾ پيشقدمي به ڪئي ان حوالي ڪيميائي ۽ جراثيمي هٿيار ٺاهڻ جو عمل به شامل آهي. ان صورتحال کي نظر ۾ رکندي، گڏيل قومن طرفان هن سلسلي ۾ مُختلف هٿيارن جي چڪاسڻ (Inspection) جو نظام جوڙيو ويو. عراقي هٿيارن جي چڪاس پُٺيان اهو ئي نظام ڪارفرما آهي. پر 1998ع کانپوءِ ڏکڻ ايشيا ۾ هندوستان ۽ پاڪستان پاران ڪيل ائٽمي ڌماڪن هٿيارن جي ڦهلاءَ وارين ڪوششن کي ڪاپاري ڌڪ هنيو آهي. هن وقت دُنيا ۾ فقط ڏکڻ آفريقاواحد مُلڪ آهي، جيڪو ائٽمي هٿيار نه ڦهلائڻ واري معاهدي تي سختيءُ سان عمل ڪري رهيو آهي. هٿيارن جي ڦهلاءَ کي روڪڻ وارو ٺاهه 12 جون1968 ۾ وجود ۾ آيو، جنهن تي عمل 5 مارچ 1970ع کان شروع ٿيو.