ويهين صديءَ ۾ جاري رهندڙ عالمي سياسي نظام ۾، ٽين دُنيا جي اُسرندڙ مُلڪن طرفان پرڏيهي پاليسيءَ جي حوالي سان اختيار ڪيل موقف، جنهن ۾ ڪنهن به فوجي بلاڪ، اتحاد يا ٻڌي (Coalition) جو حصو ٿيڻ کان پرهيز ڪئي ويئي آهي. هن نظريي ۾ يقين رکندڙ مُلڪ، ٻي مهاڀاري لڙائيءَ کانپوءِ سرد جنگ دوران پيدا ٿيل حلقي بازيءَ واري لاڙي کي رد ڪندي، آزاديءَ لاءِ وڙهندڙ رياستن جي حمايت ۽ بيٺڪي نظام کان آزاد ٿيل مُلڪن جي وچ ۾ تعاون کي زور وٺائڻ تي زور ڏين ٿا. هيءُ اصطلاح دراصل 1949ع کانپوءِ ٽين دنيا ۾ آمريڪا طرفان نيٽو جهڙو سندس حمايتي اتحاد ٺاهڻ جي ڪوششن جي خلاف رد عمل طور پيدا ٿيو ۽ ٿوري ئي عرصي ۾ آفريقا، ايشيا ۽ لاطيني آمريڪا ۾ نهايت ئي مقبول ٿيو. هيءُ نظريو اڳتي هلي اڻ ڌُري تحريڪ (Non Aligned Movement) لاءِ پيڙهه جو پٿر بڻيو.