هي اصطلاح 1970ع جي آخر ۽ 1980ع واري ڏهاڪي جي شروعات سالن دوران عالمي اداري UNESCO ۾ اُسرندڙ مُلڪن جي نمائندگيءَ جي حوالي سان ٿيندڙ بحثن ۾ سامهون آيو. جيڪو گڏيل قومن جي طرفان نوبيل امن يافته آئرش سياستدان ”مئڪ برائيڊ“ جي سرواڻيءَ ۾ قائم ڪيل ڪميشن، (Mac Bride Commission) جي گڏجاڻين ۾ استعمال ڪيو ويو. جنهن پنهنجي سفارشن ۾ عالمي ميڊيا کي بهتر ڪرڻ ۽ ان ۾ سڄي دُنيا جي نمائندگيءَ کي هڪ- ڪرائيءَ جي بُنيادن تي طئه ڪرڻ وارن نُڪتن تي زور ڏنو. هن ڪميشن طرفان ”گهڻ آواز- هڪ دُنيا“ جي عُنوان هيٺ پيش ڪيل رپورٽ ۾ ”اطلاع ۽ رابطي جي نئين عالمي نظام“ جي باري ۾ رهنما اصول ڏنا ويا ۽ چيو ويو ته دُنيا جي هر ڪُنڊ ۾ ٿيندڙ اهم واقعن ۽ اهم طاقتن جي سرگرمين جي نتيجي ۾، سڄي دُنيا تي پوندڙ اثرن کان آگاهه رهڻ ۾ ئي دُنيا جي آئيندي جي ڀلائي آهي. هن نظام تحت اُسريل دُنيا جي شهرن لنڊن، پئرس ۽ نيويارڪ ۾ قائم ٿيل ميڊيا مرڪزن جي هڪ هٽيءَ جو خاتمو آڻڻ، واقعن ۽ حادثن جي رپورٽنگ عالمي اوليتن کي نظر ۾ رکي ڪرڻ، غريب مُلڪن مٿان بين الاقوامي اشتهاري ادارن جو دٻاءُ ختم ڪرڻ، ريڊيو جي فوجي حڪمت عمليءَ لاءِ استعمال ختم ڪري ان تان سگهارن مُلڪن جي بالادستي گهٽائڻ، پولار يا خلا ۾ هٿرادو سيارن (Satellite) جي حوالي سان امير مُلڪن جي برتري گهٽائي، غريب مُلڪن جي حصيداريءَ ۾ ڪرڻ، سئٽلائيٽ ٽيليويزن چئنلن جي اجازت پوئتي پيل مُلڪن ۾ بنا اجازت داخلا تي پابنديون وجهڻ، هٿرادو سيارن ذريعي غريب مُلڪن کي زراعت ۽ قدرتي وسيلن وغيره بابت گهربل معلومات رسائڻ ۾ واڌارو ڪرڻ، ڪمپيوٽر جي دُنيا ۾ آمريڪي برتريءَ کي گهٽائي ان ۾ غريب قومن کي ڀاڱي ڀائيوار ڪرڻ ۽ آمريتي حُڪومتن هٿان صحافين کي ملندڙ تڪليفن جو ازالو ڪرڻ سميت ڪي ئي اهڙا نُڪتا شامل آهن، جن دُنيا ۾ ميڊيا جي حوالي سان بهتر ماحول فراهم ڪرڻ ۾ اهم ڪردار ادا ڪيو.