اقتصادي ناتن جي عالمگير نظام ۾ تبديليءَ لاءِ ٽين دنيا جي قيادت جو جوڙيل هي هڪ اقتصادي منشور هو. سڀ کان پهريائين اهو منشور اڻ ڌري تحريڪ (NAM) جي اڳواڻن تحريڪ جي 1973ع واري سربراهي اجلاس ۾ پيش ڪيو. ان کانپوءِ مئي 1974ع ۾ ان معاملي تي گڏيل قومن جي جنرل اسيمبلي ۾ غور ڪيو ويو. جنرل اسيمبليءَ ان نظام کي اختيار ڪرڻ لاءِ هڪ ”پروگرام آف ائڪشن“ منظور ڪيو. ساڳئي سال گڏيل قومن ۾ ”ملڪن جا اقتصادي حق ۽ فرض“ جي نالي سان هڪ ٺهراءُ پاس ڪيو. ٻنهي دستاويزن ۾ آندل تبديليءَ ذريعي دُنيا ۾ معاشي پالسين جي نئين سر جوڙجڪ جو ورجاءُ ڪيو ويو، جيڪو 1964ع کان وٺي ”يونائٽيڊ نيشنس ڪانفرنس آف ٽريڊ اينڊ ڊيولپمينٽ“ (UNCTAD) وٽ غور هيٺ هو. ان نظام ۾ واپار ۽ مکيه عالمي اقتصادي ادارن ۾ سڌارا آڻڻ ۽ ٽين دنيا جي قرضن کي ٻيهر ترغيب ڏيڻ وغيره جا نُڪتا شامل هئا. بين الاقوامي واپار پڻ ان نظام جي ترجيح ۾ شامل آهي.