Nephrotic syndrome

نيف.رو.ٽڪ.سن.ڊروم

اھڙين نشانين ۽ علامتن جو مجموعو جنھن ۾ گلوميريولي (glomeruli، بڪيءَ جا ڇاڻ ايڪا) کي نقصان پھچڻ کانپوءِ شديد پروٽِينيوروا (proteinuria، رت مان پروٽين جو پيشاب ۾ ضايع ٿيڻ) پيدا ٿئي ٿو. اھو سنڊروم ڊائبِيٽيز ميلائيٽس (diabetes mellitus)، اَميلوئاڊوسس (amyloidosis)، گلوميرولونيفرائيٽس (glomerulonephritis)، شديد ھائپرٽينشن (hypertension)، زھرن لاءِ ردعمل يا دوائن جي موٽ ۾ اگرو اثر پيدا ڪري ٿو. نيفراٽڪ سنڊروم جي مکيو نشاني، ايڊيما (oedema، پاڻيٺ ڀرجي وڃڻ) سبب ٽنگن ۽ منھن جي سوڄ ٿئي ٿي. ان کانسواءِ پاڻيٺ ڇاتيءَ جي ڀانڊي ۾ گڏ ٿي پلورل اِفيوزن (pleural effusion) يا پيٽ ۾ پاڻي جمع (ascites) ڪري سگهي ٿي. ان کانسواءِ دست، سستي ۽ اينوريڪسيا (anorexia) به ٿي سگهن ٿا. علاج جو مدار اصلي ڪارڻ آھر ڪجي ٿو. گهٽ لوڻ وارو کاڌو کائڻ جي سفارش ڪجي ٿي ته ڊائِيوريٽڪ دوائون به ڏئي سگهجن ٿيون ته جيئن ايڊيما گهٽائي سگهجي. ورلي، اي سي اِي انھبٽر (ACE inhibitors)، ڪورٽيڪوسٽِيروائڊ (corticosteriods) يا اِميونوسپريسنٽ (immunosuppressants) به استعمال ڪري سگهجن ٿيون. جيڪڏھن رت ۾ پروٽين جي گهاٽائي گهڻي گهٽ ھجي ته نس رستي پروٽين ڏئي سگهجي ٿي.