Myocarditis

مايو.ڪار.ڊاءِ.ٽس

دل (heart) جي مشڪ جي سوزش. جنھن جي ٿيڻ جو گهڻو عام ڪارڻ ڪو وائرسي روڳ ٿئي ٿو، جڏھن ته اھا ٻين ڪيترن روڳن ۽ بيمارين ڪري به ٿي سگهي ٿي. مايوڪارڊائيٽِس، ريوميٽڪ فيور (rheumatic fever) جي عام نشاني ٿئي ٿي، جڏھن ته اسريل ملڪن ۾ اھو ورلي ڪو ڪارڻ ٿئي ٿو. عام طور تي ان جون نشانيون پيدا نٿيون ٿين. ورلي، دل جي ڌڙڪي ۾ شديد خلل پيدا ٿئي ٿو، ساه جي مونجهه، ڇاتيءَ جو سور ۽ دل فيل (heart failure) ٿي سگهي ٿي. شديد حالتن ۾ دل جي بند ٿي وڃڻ (cardiac arrest) ڪري اھڙو فرد مري به وڃي ٿو. مريض جي ھسٽري ۽ جسماني تپاس مان مايوڪارڊائيٽِس جو شڪ ڪري سگهجي ٿو. اِي سي جي (ECG) ڪرڻ سان دل جي ڌڙڪي جون مخصوص بي قاعدگيون ظاھر ٿي پون ٿيون. تشخيص لاءِ اِڪو ڪارڊيوگرافي (echocardiography)، ڇاتيءَ جي ايڪسري (X-ray) ۽ رت جون تپاسون به ڪجن ٿيون. ان جو مخصوص علاج نٿو ٿئي. عام طور تي، بستري تي آرام ڪرڻ جي سفارش ڪجي ٿي. شديد حالتن ۾ انتھائي نگهداشت وارڊ ۾ سھائتي علاج (supportive treatment) ڏيڻ ضروري ٿي سگهي ٿو.