Muscular system

مسڪ.يو.لر ـ سسٽم

مشڪائون سرشتو جنھن جون مشڪون جسم جي ھڏائين پڃري (skeleton) سان ڳنڍيل ٿين ٿيون. مشڪون خودمختيار/ والنٽري چرپر ڪرائڻ جون ذميوار ٿين ٿيون، ھڏائين پڃري کي جهل ڏين ۽ مستحڪم رکن ٿيون. ڪيترين حالتن ۾ ڪا مشڪ ڪنھن ھڏي سان ڳنڍيل ھوندي (عام طور تي ڪنھن جوٽي tendon سان ) ڪو سنڌ ٽپي ڪنھن ٻئي ھڏي سان وڃي ڳنڍجي ٿي. مشڪون، ڪوئجي ۽ لنڊيون ٿي جنھن ھڏي سان ڳنڍيل ٿين ٿيون، ان کي ڇڪي چرپر ڪرائين ٿيون. مشڪون رڳو ڇڪي سگهن ٿيون پر ڌڪي نٿيون سگهن جنھن سبب اھڙيءَ طرح سان جوڙيل ٿين ٿيون جو ڪنھن ھڪ مشڪ يا مشڪن جي جهڳٽي جي ڇڪ لاءِ ٻيءَ ۾ مزاحمت پيدا ٿئي ٿي جنھن سبب اٻتڙ چرپر ٿي سگهي ٿي. جيتوڻيڪ ھڏائين مشڪن جا گهڻا عمل شعوري عمل رستي ٿيندا رھن ٿا تنھن ھوندي به ڪن مشڪن جي رفليڪس چرپر، تحرڪ (stimuli) جي موٽ ۾ پيدا ٿين ٿا.جسم ۾ 600 سون کان وڌيڪ مشڪون ٿين ٿيون جن جي درجيبندي انھن جي چرپر جي حساب سان ڪجي ٿي. انھن مان ايڪٽينسر (extensor) ڪنھن به سنڌ کي ٻاھر کولي ٿي، فليڪسر (flexor) ان کي بند ڪري ٿي، ايڊڪٽر (adductor) جسم جي ڪنھن حصي کي اندرتي ڇڪي ٿي، ابڊڪٽر (abductor) ٻاھرتي چوري ٿي، ليويئٽر (levator) مٿي اڀاري ٿي، ڊپريسر (depressor) ھيٺ ڪري ٿي ۽ ڪنسِٽرڪٽر (constrictor) يا اِسفنسٽر (sphincter) مشڪون سوراخن کي گهيريل ھجن ٿيون ۽ انھن کي بند ڪن ٿيون.