Mononucleosis, infectious

مونو.نيو.ڪليئو.سس ـ انفيڪشس

عام طور تي گلينڊيولور فيور (glandular fever) جي نالي سان سڏجي ٿو، ھڪ قسم جو شديد وائرسي روڳ پيدا ڪري ٿو، جنھن جون نشانيون تيز بخار، نڙيءَ جو سرڪو ۽ خاص طور تي نڙيءَ جا سڄيل لِمف نوڊ ٿين ٿا. گهڻو عام ايپسٽيئن بار وائرس (Epstein-Barr virus) سبب ٻالڪپڻي يا بالغپڻي ۾ گهڻو عام ٿئي ٿو. ان جي ڦھلجڻ جو ھڪ طريقو چم چٽ ڪرڻ به سمجهيو وڃي ٿو. جسم ۾ ھي وائرس، لِمفوسائيٽن (مونونيوڪليئر سيل به سڏجن) ۾ واڌ ڪري ٿو جنھن سبب اھي بيڊولا ٿي وڃن ٿا. بيماريءَ جي پھريون نشانيون بخار ۽ مٿي جو سور ٿين ٿا ان کانپوءِ لِمف نوڊ سڄي وڃن ٿا ۽ نڙيءَ جي شديد سوزش ٿي پوي ٿي. ورلي، ڪلين (tonsils) جي وڌي وڃڻ سبب ساه کڻڻ ۾ رڪاوٽ ٿي سگهي ٿي. جيري جي ھلڪي سوزش پيدا ٿي يرقان پيدا ڪري سگهي ٿي. عام طور تي تشخيص نشانين ۽ رت جي تپاس رستي ڪجي ٿي. صحتياب ٿيڻ ۾ عام طور تي 4 کان 6 ھفتا لڳي وڃن ٿا، ان جو علاج رڳو آرام ڪرڻ ٿئي ٿو. ورلي حالتن ۾ شديد سوزش گهٽائڻ لاءِ خاص طور تي جڏھن ساه جي مونجهه به پيدا ٿيندي ھجي ته ڪورٽيڪوسٽيروائڊ (corticosteroid) دوائون ڏجن ٿيون. نوبني ٿي وڃڻ کان 2 کان 3 مھينا پوءِ عام طور تي مريض منجهيل، ڪمزوري ۽ ڏينھن جي وقت ۾ ننڊاکڙائپ محسوس ڪري ٿو.