اصطلاحي لحاظ کان انساني آبادين جو اهو گروهه، جيڪو اڪثريت ۾ نه هجڻ ڪري سياسي طرح فيصلائتي حيثيت نه رکندو هُجي ۽ سماجي رتبي، تعليم، روزگار، ملڪيت ۽ سياسي سگهه ۾ ڪنهن به اڪثريتي ڌُر سان بَرُميچي نه سگهي. سياسي لحاظ کان ٿورائيءَ تي ٻڌل اقليت هڪ اهڙو نسلي گروهه هوندو آهي، جنهن جي ڪنهن خاص مسئلي، گڏيل مفاد، نظريي يا خيال تي پنهنجي برادريءَ جي ٻين ميمبرن سان اتحاد هُجي ٿيو. اقليتون ٿورائيءَ ۾ هُجڻ ڪري پنهنجي پسند موجب زندگي گُذاري نه سگهنديون آهن،چاڪاڻ جو سياسي طور سگهاريون هئڻ ڪري اڪثريتون پنهنجي پسند مٿن مڙهينديون آهن. انهيءَ ڪري غير محفوظ هُئڻ سبب اقليتون خاص توجهه، بُنيادي سلامتي ۽ آزاد فيصلو ڪرڻ جو حق طلبينديون آهن. اقليتون پنهنجن اجتماعي مُفادن جي تحفظ لاءِ اڪثريت جي ڀيٽ ۾ وڌيڪ منظم ۽ يڪ راءِ هونديون آهن ۽ منجهن وڌيڪ رابطو رهندو آهي. عام طور اقليتن جا جنسي، مذهبي، علائقائي، نسلي ۽ لساني مفاد ٿين ٿا