Megacolon

مي.گا.ڪو.لون

وڏي آنڊي (colon) جي تمام گهڻي واڌ، عام طور تي ان سان شديد ۽ ديرپا قبضي (constipation) به ٿي پوي ٿي. ٻارڙن ۾ ميگاڪولون ٿيڻ جو مکيو ڪارڻ؛ اَينل فشر (anal fissure)، ھرش اسپرنگس (Hirhschsprung’s) بيماري ۽ نفسياتي پھلو ٿين ٿا جيڪي ممڪن آھن ته ٽوائليٽ ٽريننگ دوران پيدا ٿيا ھجن. پيرسنن ۾ ان بيماريءَ جي ڪارڻن ۾ شامل ٿين ٿا گهڻي وقت کان طاقتور قبض ڪشا دوائن جو استعمال ڪرڻ. جيڪي فرد ڪرانڪ ڊِپريشن (depression) يا اسڪيزوفرينيا (schizophrenia) ۾ مبتلا ٿين ٿا تن کي عام طور تي ميگاڪولون ٿي پوي ٿي. ان جا ٻيا ورلي ڪارڻ ھائپوٿائروائڊزم (hypothyroidisim)، مغزي ڏوريءَ جي ضرب (spinal injury) ۽ دوائون جھڙوڪ: مارفين (morphine) ۽ ڪوڊين (codeine) ٿين ٿيون. ميگاڪولون سبب قبضي ۽ پيٽ بميل رھي ٿو. ان سان گڏ بک جي مري وڃڻ سبب وزن گهٽجي وڃي ٿو. دست تڏھن ٿي پون ٿا جڏھن نيم پاڻيٺي ڪرفتي روڪ پيدا ڪندڙ نھريءَ ڪرفتيءَ مان ٽمي وھي پوي ٿي.تشخيص لاءِ پروڪٽواسڪوپي (proctoscopy)، بيريم ايڪسري (barium x-ray) تپاس ۽ آنڊن جي مشڪن جي ڪم جون چڪاسون ڪجن ٿيون. جيڪڏھن ھرش اسپرنگس (Hirschsprung’s) بيماريءَ جو شڪ ھجي ٿو ته وڏي آنڊي جي بايوپسي (biopsy) رستي پڪ ڪري سگهجي ٿي. ڦاٿل ڪرفتيءَ کي خارج ڪرڻ لاءِ حقنو (enemas) ڏئي سگهجي ٿو. سنگين حالتن ۾ ڪرفتي ھٿ سان ڪڍڻي پوي ٿي.