Mastectomy

ماس.ٽيڪ.ٽومي

آپريشن رستي سڄو ارھه ڪٽي ڇڏڻ جيڪو عام طور تي ارھه جي ڪينسر جي علاج لاءِ ڪجي ٿو. ماسٽيڪٽومي يا ته گهڻي وگهريل ارھه جي ڪينسر لاءِ يا ڪينسر جي گهڻين ڳوڙھين جي حالت ۾ ڪري سگهجي ٿي. ننڍين ڪينسرن لاءِ لَمپيڪٽومي (lumpectomy) يا ڪواڊِرنٽيڪٽومي (quadrantectomy) مناسب ٿي سگهي ٿي. ماسٽيڪٽوميءَ ۾ ڇاتيءَ جا سڀ ٽشو (ماس) ۽ عام طور تي ڪڇ جا ڪجهه يا سڀ لِمف نوڊ (lymph nodes) ڪڍي ڇڏجن ٿا. لِمف نوڊن جا سيل تپاسي ڏسجي ٿو ته آيا ڪينسري سيل ڇاتيءَ جي ڪينسري ڳوڙھي مان پکڙجي ته نه ويا آھن. آپريشن ڪرڻ کان اڳ ۾ ڪيموٿراپي (chemotherapy) ڪري سگهجي ٿي ته جيئن ڳوڙھيءَ کي سسائي سگهجي. آپريشن عام بيھوشيءَ جي حالت ۾ ڪجي ٿي ۽ عام طور تي ڪيترن ڏينھن تائين اسپتال ۾ رھڻو پوي ٿو. ساڳي وقت ماسٽيڪٽومي ڪرڻ کانپوءِ يا اڳتي ھلي ارھه جي ٺاھه ٺوھه ڪرڻ لاءِ پلاسٽڪ سرجري (plastic surgery) به ڪري سگهجي ٿي (ڏسو، mammoplasty). آپريشن کانپوءِ علاج طور ريڊيوٿراپي (radiotherapy) ڏئي سگهجي ٿي خاص طور تي جڏھن ڪينسر لِمف نوڊن ڏانھن وگهري ويئي ھجي. عام طور تي ريڊيوٿراپي آپريشن کان ھڪ مھينو پوءِ شروع ڪجي ٿي ۽ 3 کان 6 ھفتن تائين ھلي ٿي. آپريشن کانپوءِ ٽماڪسفِن (tamoxifen) دوا يا ڪيموٿراپي به ڏئي سگهجي ٿي.