رجوعيت جو نظريو سياسيات- رجوع پسندي

هيءُ بنيادي طور اٽليءَ سان لاڳاپيل نظريو آهي، جيڪو اٽليءَ جي ڪن اٽليائي ٻولي ڳالهائيندڙ علائقن کي زوريءَ آسٽريا ۾ شامل ڪرڻ سان رد عمل طور وجود ۾ آيو. هن نظريي جي وڪيلن آسٽريا طرفان قبض ڪيل اٽليءَ جي علائقن تان کيس بيدخل ڪري، هم زبان هموطنن کي واپس اٽليءَ جو حصو بڻائڻ لاءِ جاکوڙ ڪئي. اريڊينٽر اصل ۾ اٽالي لفظ ”اريڊنٽا“ مان نڪتل آهي. جنهن جو مطلب ”ڪنهن به اقليت جو هڪ مُلڪ مان ڌار ٿي ڀر واري مُلڪ جي هم زبان اڪثريت سان شامل ٿيڻ“ وارو آهي. رجوع پسنديءَ جي تحريڪ ارڙهين صديءَ ۾ شروع ٿي ۽ ان بيشمار ڪاميابيون ماڻيون. هن تحريڪ ذريعي ئي آسٽريا ۾ حُڪمران چانسلر ’مئٽرنخ‘ جي رجعت پسند راڄ کي شڪست نصيب ٿي ۽ ٽُڪرا ٽوٽا ٿيل اٽليءَ جو ميلاپ ممڪن ٿيو. جيتوڻيڪ هيءُ اصطلاح اڳ ۾ فقط اٽليءَ جي ايڪي جي حوالي سان استعمال ٿيندو هو، پر اڄڪلهه دُنيا جي ڪنهن به خطي ۾ ٻولي ۽ ثقافت ۾ حصيداريءَ جي بُنياد تي ماڻهن جي ايڪي واري عمل کي به ”اريڊينٽزم“ جي حوالي سان سُڃاتو وڃي ٿو