Intestine, disorders of

اِن.ٽيسٽن ـ ڊس.ئارڊرس ـ آف

آنڊو مختلف قسمن جي بناوتي نقصن، ڪيترين بيمارين پيدا ڪندڙن جيوڙن ۽ پئراسائيٽن سبب ته ڳوڙھين ۽ ٻين بيمارين ۾ به متاثر ٿي سگهي ٿو. بناوتي نقص پيدائشي موجود ٿين ٿا ته پوءِ به پيدا ٿي سگهن ٿا. اھي آنڊي ۾ رڪاوٽ پيدا ڪن ٿا (ڏسو، intestine, obstruction of) جن ۾ اَيٽريسيا (atresia)، اِسٽينوسِس (stenosis) ۽ والويولَس (vulvulus) شامل ٿين ٿا. نون ڄاول ابھمن ۾ ڏاسو (meconium، ابھم جي آنڊي جو مواد) آنڊي ۾ روڪ پيدا ڪري سگهي ٿو. آنڊي جي عام طور تي پيدا ٿيندڙ سوزش وائرسي يا بئڪٽيريائي روڳن سبب پيدا ٿي سگهي ٿي يا ان جا ڪارڻ اَروڳي (noninfectious) به ٿي سگهن ٿا جھڙوڪ: اَلسريٽو ڪولائيٽِس (ulcerative colitis) ۽ ڪروھنس بيماري (Crohn’s disease). عام طور تي گئسٽرواِِنٽيرائيٽس (gastroenteritis) اصطلاح تڏھن استعمال ڪجي ٿو جڏھن معدي ۽ آنڊن جي سوزش ھجي ٿي، جن روڳن ۾ وائي (food poising)، ٽريولرس ڊائريا (traveller’s diarrhoea)، ڪالرا (cholera)، اميبِياسس (amoebiasis) ۽ جيارڊياسِس (giardiasis) شامل ٿين ٿيون.آنڊن جي ڪيڙن ۾ گول ڪينئان (roundworms) ۽ ٽيپورم (tapeworms) شامل ٿين ٿا. ورلي، آنڊي جي سوزش مقامي ٿئي ٿي جھڙوڪ: اپينڊِيسائيٽِس (appendicitis) ۽ ڊائورٽِيڪيولر ڊزيز (diverticular disease). ننڍي آنڊي جون ڳوڙھيون ورلي پيدا ٿين ٿيون ته اَڪينسري (noncancerous) واڌ، لِمفوما (lymphomas) ۽ ڪينسري ڳوڙھيون (carcinoid tumors) پيدا ٿي سگهن ٿيون. وڏي آنڊي جون ڳوڙھيون عام ٿين ٿيون (ڏسو، colon, cancer of, rectum, cancer of ). ڪن قسمن جا موروثي نڪرا (polyposis) ڪينسر ۾ واڌ ڪري سگهن ٿا. آنڊي ڏانھن رت جي ناقص رسد (ischaemia) ٿي سگهي ٿي جنھن جو ڪارڻ پيٽ جي ڀت جي شريانن جو جزوي يا مڪمل طور تي بند ھجڻ (جھڙوڪ: atherosclerosis بيماري) يا رت نلين جو چَٻيل يا گهٽيل ھجڻ ٿي سگهي ٿو جيئن انٽوسَسَيپشن (intussusception) يا ھرنيا (hernia) ۾ ٿئي ٿو. رت جي رسد نه ٿيڻ سبب گينگرين پيدا ٿي سگهي ٿي. آنڊي کي متاثر ڪندڙ ٻين تڪليفن ۾ پيپٽڪ اَلسر (peptic ulcer)، ڊائورٽيڪيولوسِس (diverticulosis)، ناقص جذبيت (malabsorption)، ڪوليئڪ ڊزيز (coeliac disease) ۽ اِريٽيبل بائول سنڊروم (irritable bowel syndrome) شامل ٿي سگهن ٿا.