1990ع واري ڏهاڪي جي شروعات کان وچ اوڀر آفريقا جي مُلڪ روانڊا ۾ گهرو لڙائي عمل ۾ آئي، جنهن جي نتيجي ۾ مُلڪ جي ٻن مُک قبيلن ”هُوتو“ (Hutu) ۽ ”تُوتُسي“ Tutsis) وچ ۾ گهڻي رتوڇاڻ ۽ خون خرابو ٿيو. انهيءَ قتل عام کي ننديندي، گڏيل قومن جي سلامتي ڪائونسل 1 جولاءِ 1994ع تي ٺهراءُ نمبر، 935 پاس ڪندي، هڪ ڪميشن جي قيام جو مشورو ڏنو. جيڪا روانڊا جي صورتحال جو جائزو وٺي، گهرو لڙائيءَ ۾ ٿيل جنگي ڏوهن جي جانچ سان گڏ، بين الاقوامي قانون جي ڀڃڪڙيون ڪندڙن ۽ ٿيل قتلام جون ذميواريون طئي ڪري. ڪميشن طرفان مليل رپورٽ جي روشنيءَ ۾ گڏيل قومن جي سيڪريٽري جنرل، روانڊا ۾ ٿيل جنگي ڏوهن بابت، بين الاقوامي خاص عدالت جوڙڻ جي تجويز ڏني. ان تجويز تي عمل درآمد جي سلسلي ۾ نومبر 1994ع ۾ ڇهن ججن (تنزانيا ۾) پنجن اپيل ٻُڌندڙ ججن (هيگ ۾) ۽ هڪ چيف پراسيڪيوٽر تي ٻڌل خاص ٽربيونل قائم ٿي، جنهن کي 1 جنوري 1994ع کان 31 ڊسمبر 1994ع تائين روانڊا ۾ ٿيل قتلام جا ڪيس هلائڻ جي ذميواري ڏني وئي. انهيءَ ٽربيونل 50 مقدما هلائي 29 جوابدارن کي سزائون ڏنيون