هن اصطلاح کي 1977ع ۾ سياسي دانشور ’ميننگ‘ (Manning) پنهنجي مضمون ۾ استعمال ڪيو. ميننگ جو خيال آهي ته Intermestic (جيڪو ٻين لفظن Internatinal ۽ Domestic جو جوڙ آهي) جي ذريعي منشيات، اميگريشن ۽ ماحول جي گدلاڻ وارن مسئلن جي خاتمي لاءِ سڀ اصولي ۽ روايتي قانوني رڪاوٽون هٽائي ڇڏڻ ۾ ڪا به خرابي ناهي. جيڪڏهن ڪنهن ملڪ ۾ اهڙي قسم جا مسئلا درپيش آهن ته ٻئي ملڪ کي اجازت هجڻ کپي ته اهي مسئلا حل ڪرڻ ۾ گهربل ڪردار ادا ڪري. يورپ ۾ ”انٽرميسٽڪ“ معاهدي تحت يورپي يونين کي ميمبر ملڪ آهستي آهستي اِهي اختيار ڏين پيا، ته جيڪڏهن ڪنهن ميمبر ملڪ ۾ هتي ڄاڻايل غيرقانوني سرگرميون يا منفي مسئلن مان ڪو به هڪ وڌي وڃي ته يورپين يونين پنهنجو اثر رسوخ استعمال ڪري سگهي ٿي. ”انٽرميسٽڪ“ جي اهميت کي ڏسندي دُنيا ۾ ڪافي اهڙيون پاليسيون جوڙيون ويون آهن، جن تحت سياسي، سماجي، معاشي ۽ تعليمي مسئلا حل ڪري سگهجن. انهيءَ ڏس ۾، ڄاڻايل معاملن ۾ ڪنهن به مُلڪ جي پرڏيهي وزارت جو ڪو گهڻو عمل دخل نه هوندو، پر ان ملڪ جي گهرو مامرن ۽ بين الاقوامي مفادن جو تمام گهڻو خيال رکڻو پوي ٿو