Intercourse, painful

(اِن.ٽر.ڪورس ـ پئن.فُل

جماع (sexual intercourse) ڪرڻ دوران سور، تڪليف يا درد ٿيڻ جنھن کي طبي لحاظ کان ڊسپيريوينيا (dyspareunia) سڏجي ٿو جيڪو ٻنھي عورت ۽ مرد کي متاثر ڪري سگهي ٿو. اھڙو سور مٿاڇرو (جڏھن ٻاھرين جنسي عضون جي چوگرد ٿئي) يا گهرو (نھائينءَ ۾ محسوس ڪجي) به ٿي سگهي ٿو. مردن ۾ مٿاڇري سور ٿيڻ جو ڪارڻ جسماني بناوت جون بي ڊولايون جھڙوڪ: ڪورڊي (chordee، وريل انگيز) يا فيموسس (phimosis، کوپي جو سوڙھو ھجڻ) ٿين ٿيون. پراسٽيٽائيٽِس (prostatitis) سبب نھائين جو گهڻو پکڙيل سور، آلت ۾ ساڙي جو احساس يا انزال وقت سور پيدا ٿي سگهي ٿو. اسڪيئرنگ (scarring، مثال طور؛ ويم کانپوءِ) ۽ گرڀ ناليءَ جو خاص طور تي سنڍجڻ (menopause) کانپوءِ مَک جو پيدا نه ٿيڻ، عورتن ۾ جنسي ميلاپ/ سنڀوڳ دوران سور پيدا ڪري سگهي ٿو. سائيڪوسيڪشوئل ڊِسفنڪشن (psychosexual dysfunction) به ھمبستريءَ دوران درد پيدا ڪري سگهي ٿو. ويجينزمس (vaginismus) ھڪ اھڙي حالت ٿئي ٿي جنھن ۾ گرڀ ناليءَ جي مشڪن ۾ پيڙاڪن ڳڍڙيون پون ٿيون عام طور تي ان جو بنيادي ڪارڻ نفسياتي ٿئي ٿو. گهري يا اونھائيءَ ۾ با بار پوندڙ سور جو عام ڪارڻ نھائين جا نقص ٿين ٿا (جھڙوڪ: fibroid, endometriosis or pelvic inflammatory disease، جنسي وچڙندڙ روڳ ٿين ٿا)، آنيدانين جا نقص (جھڙوڪ: ovarian cysts) ۽ ڳھڻ (cervix) جا نقص ٿين ٿا. اھڙا ٻيا ڪارڻ سِسٽائيٽِس (cystitis) ۽ پيشاب لنگهه جا روڳ (urinary tract infections) ٿين ٿا.علاج جو مدار سور جي اصلي ڪارڻ آھر ڪجي ٿو، جيڪڏھن اھنج جو اصلي سبب نفسياتي ھجي ته ان لاءِ مخصوص ڪائونسلنگ ڪجي ٿي (ڏسو، sex therapy).