شڪل، خيالي تصوير، بت

تصوير- تصور- خيال- خاڪو

پاڇو، شبيهه، عڪس

ڪنهن به فرد يا گروهه جي طرفان آسپاس جي سماجي ۽ طبعي حالتن جي ڪيل داخلي منظر ڪشيءَ کي خاڪو، تاثر، تصور يا اثر چيو وڃي ٿو. هيءُ ماضي، حال يا مستقبل بابت حقيقت کان هٽيل اُها تصوراتي ماجرا آهي، جيڪا مخصوص قسم جي نفسياتي وارتائن مان گذري مختلف سُوجهين کي گڏي، هڪ مڪمل خيال جو روپ وٺي دنيا آڏو نروار ٿئي ٿي. بين الاقوامي تعلقات ۾ هڪ تصور ڪنهن به شخص طرفان پنهنجي قومي سڃاڻپ ذريعي قومي ترجيحن کي قومن جي برادريءَ ۾پيش ڪرڻ سان شروع ٿئي ٿو. اهڙي طرح هن علم ۾ ”تصور“ بابت محسوس ڪرڻ جهڙو بنيادي ايڪو ڪنهن به شخص جي نسلي واسطيداري يا قومي لاڳاپي جي صورت ۾ ظاهر ٿيندو آهي. Image بابت اها وضاحت هر فرد جي سماجي اوسر ۽ ماحول سان وابستگيءَ جي بنياد تي طئي ٿئي ٿي. عام طور اڪثر قومي رياستن ۾ ”تاثر“ کي رابطائي نظام جي ذريعي سگهارو ڪري، اُن کي پروپئگنڊا جو حصو بڻايو وڃي ٿو. Image هميشه ڪنهن وارتا جي نتيجي ۾ يا تصوراتي طريقي سان جڙڻ ڪري، قربت يا رقابت جي احساسن کي جنم ڏئي ٿو. انهيءَ ڪري دوستيءَ يا دشمنيءَ ڀريا تاثر بين الاقوامي برادريءَ ۾مختلف قومن وچ ۾ لاڳاپن جو رُخ متعين ڪن ٿا، جنهن جي نتيجي ۾ دوستيءَ وارا رويا اختيار ڪرڻ سان قومن ۾ دوستيءَ ۽ دُشمنيءَ ڀريا رويا تڪرارن کي وڌائين ٿا. اهڙي قسم جي لاڙي کي عام طور ”اصل اولڙي“ (Mirror Image) جي اصطلاح سان به سڏيو وڃي ٿو. مشهور سماجي سائنسدان ڪي- اي بوڊلنگ (K.E Boulding) جي ڪيل تحقيق ۾ هن اصطلاح بابت 1956ع ۾پهريون دفعو تفصيل سان تذڪرو ڪيو ويو آهي. انهيءَ کان علاوه Image جي حوالي سان بين الاقوامي تعلقات ڏانهن علم نفسيات جي رُخ کان ڪيل تحقيق ۽ ”عام راءِ“ (Public Opinion) واري پهلوءَ کان ڪيل کوجنا جو به خاص لاڳاپو ظاهر ڪيو ويو آهي