هي ٻه ڌار ڌار علم ۽ مضمون آهن ، پر ڪن مغالطن سبب ٻنهي کي هڪ ٻئي سان ڳنڍيو ويندو آهي.’بين الاقوامي تعلقات‘ کي ’بين الاقوامي سياست‘ جو نالو نه ٿو ڏئي سگهجي، ڇاڪاڻ جو بين الاقوامي سياست (International Politics) ۽ I.R جي دلچسپيءَ جا ميدان مختلف آهن. جديد دور ۾ ’بين الاقوامي سياست‘ کي I.R جي هڪ شاخ چئي سگهجي ٿي ، البته انهيءَ شاخ جا قاعدا ۽ قانون ڌار آهن . IR سدائين بين الاقوامي ضابطن قانونن تحت ڪم ڪندي آهي، هي مُلڪن جي وچ ۾ معاشي، سماجي ۽ قانوني لاڳاپن کي جوڙڻ ۽ زندگيءَ جي هر رخ ۾ گڏجي ڪم ڪرڻ جو نالو آهي . جڏهن ته ’بين الاقوامي سياست‘ ۾ هر قوم جي سوچ ويچار ، ڏانءُ ، گهاڙيٽا ۽ مفاد الڳ هوندا آهن. ان ڪري سندس دائرو سفارتڪاري ۽ رياستن وچ ۾ سرڪاري رابطا برقرار رکڻ تائين محدود آهي . I.R ۽ بين الاقوامي سياست ۾ تمام گهڻا فرق آهن پرتنهن هوندي به I.R جا ڪجهه ماهر پراڻي لاڳاپي جي ڪري اُن مضمون کي ’پوليٽيڪل سائنس‘ جي شاخ چون ٿا. انگلينڊ ۽ آمريڪا جا جوڙيل بين الاقوامي ادارا هن خيال جا حامي آهن ته I.R جو علم گهڻ-رخو آهي، پر هن علم جا خاص نُڪتا سياست جي علم منجهان کنيل آهن. انهيءَ ڪري ئي ”ورلڊ پاليٽڪس“، ”فارين افيئرز“ ”انٽرنيشنل پاليٽڪس“ جا علم I.R سان گڏائي پڙهايا وڃن ٿا. ان کان علاوه ’بين الاقوامي تعلقات’ جي اهم فڪري نظرين ، مثال طور، ’معياري نظريي‘ (Normative Theory) ، پرڏيهي پاليسيءَ ۽ معيشت جا شعبا (جن جي I.R ۾ بنيادي حيثيت آهي) کي به پوليٽيڪل سائنس جا ماهر جوڙيندا آهن