Hypercalcaemia

ھاءِ.پر.ڪال.سِي.مِيا

رت ۾ ڪيلشم جو غيرمعمولي طور تي گهڻو مقدار ھجڻ جنھن جو عام طور تي ڪارڻ ھائپرپيراٿائروائڊِزم (hyperparathyroidism) ٿئي ٿو. ڪينسر به ھائپرڪالسيميا پيدا ڪري سگهي ٿي جنھن جو ڪارڻ يا ته ھڏن ڏانھن وگهرڻ يا غيرمعمولي طور تي ھارمون پيدا ڪرڻ ٿئي ٿو جيڪي ھڏن مان ڪيلشم خارج ڪن ٿا. ان جو گهٽ ڪارڻ، وٽامن ڊيءَ جو حد کان وڌيڪ مقدار واپرائڻ يا ڪي سوزشي نقص جھڙوڪ: سارڪوئِڊوسس (sarcoidosis) ٿين ٿا. ھائپرڪالسيميا سبب اوڪارا، الٽي، سستي، ڊپريشن، تاس ۽ حد کان وڌيڪ پيشاب اچڻ ٿئي ٿو. رت ۾ ڪيلشم جو گهڻو مقدار مونجهارو، شديد ٿڪ ۽ مشڪن جي ڪمزوري پيدا ڪري ٿو. علاج کانسواءِ دل جي ارِڌمياسس (arrhythmias)، بڪين جو ناڪاره ٿيڻ (kidney failure) ۽ سڪتو (coma) به پيدا ٿي سگهي ٿو. گهڻي وقت کان رھندڙ ھائپرڪالسيميا، نيفروڪالسِينوسس (nephrocalcinosis) يا بڪين جو پٿريون پيدا ڪري سگهي ٿي (ڏسو، calculus, urinary tract). تشخيص لاءِ رت جون تپاسون ڪجن ٿيون. علاج اصل ڪارڻ آھر ڪجي ٿو.